Shymkentte 7 adamnyń ıisten ýlanyp qaıtys bolýyna baılanysty ákimdikte jedel keńes ótti
ShYMKENT. QazAqparat - Shymkentte úsh táýlikte 7 adam ıisten ýlanyp qaıtys boldy. Marqumdardyń tórteýi kámelet jasyna tolmaǵan jetkinshekter edi. Osyǵan oraı búgin qalalyq ákimdikte turǵyndardyń qaýipsizdigi máseleleri boıynsha jedel keńes ótti, dep habarlaıdy QazAqparat tilshisi.
Shahar basshysy Nurlan Saýranbaevtyń tóraǵalyǵymen ótken keńeste turǵyndarmen profılaktıkalyq is-sharalar júrgizýden bastap, úı jaǵdaıyndaǵy qaýipsizdik sharalarynyń saqtalýyn qadaǵalaý máseleleri talqylandy. Sońǵy úsh táýlik ishinde 7 adamnyń gazdan ýlanýyna baılanysty jaýapty basshylarǵa oqys oqıǵalardyń árbirine jiti tekserý uıymdastyrý tapsyryldy. Sondaı-aq keńes barysynda birqatar sheshimder qabyldandy.
Birinshiden, aýdandyq ákimdik, TJ, polıtsııa men gaz júıesiniń mamandarynan arnaıy mobıldi top qurylatyn boldy. Top quramyna profılaktıkalyq is-sharalar júrgizýge úı jáne kóshe tekserýshileri jumyldyrylmaqshy. Olar arnaıy qurylǵan komıssııamen birge júrip, árbir mekenjaıdy tekserip shyǵady. Aǵymdaǵy jyldyń 22 jeltoqsanyna deıin qaladaǵy árbir úıge, páterge baryp, túsindirý jumystaryn júrgizýmen qatar, murjalary men gaz qubyrlaryn tekseredi dep josparlanǵan.
Ekinshiden, barlyq mektepte kómirqyshqyl gazynan ýlanýdyń aldyn alý jáne ony boldyrmaý jóninde sabaqtar uıymdastyrylady. Úshinshiden, qalada turǵyndardan tehnıkalyq qyzmet kórsetýge aqsha jınap, alaıda qyzmetine nemquraıly qaraıtyn gaz júıesi boıynsha qyzmet kórsetýshi kompanııalardyń basshylarymen jınalys ótkiziledi dep kútilýde.
Mańyzdy keńeste sondaı-aq, gaz dabyldaryn ornatý máselesi de kóterildi. Bul máseleler boıynsha kelesi kezdesý 22 jeltoqsanda ótetin bolyp kelisildi. Al, ákimshilik pen gaz júıesiniń qyzmetkerleri turǵyndardy saqtyq sharalaryn saqtaýǵa shaqyrdy.
«Úıińizdegi gaz qubyryn, murjanyń bitelmeýin tekserińizder. Murja joq bolsa, arnaıy mamandar shaqyryńyzdar. Ózińizdiń jáne jaqyndaryńyzdyń qaýipsizdigi úshin qarapaıym erejelerdi saqtańyzdar» delingen ákimdiktiń eskertpesinde.
