Shymkentte «7-20-25» baǵdarlamasymen úı alýǵa 77 adam ótinish bergen
Quramyna QR Májilis depýtattary Azat Perýashev pen Berik Dıýsembınov, «Qazaqstan-2050» jalpyulttyq qozǵalys keńesiniń tóraǵasy Muhtar Mankeev, Qazaqstan joǵary oqý oryndary qaýymdastyǵynyń prezıdenti Rahman Alshanov pen QHA tóraǵasynyń orynbasary Vıtalıı Tvarıonas kirgen komıssııa músheleri birqatar áleýmettik nysandardy aralap, jergilikti bılik pen kásipkerlerdiń usynystaryn tyńdady.
Sapar barysynda delegatsııa músheleri Ońtústik Qazaqstan pedagogıkalyq ýnıversıtetiniń Stýdentter úıine baryp, jańadan salynyp jataqhanamen tynysty. Oqý ornynyń rektory Irına Efımovanyń málimdemesine sáıkes, bıylǵy oqý jylynda ýnıversıtette shamamen 7,2 myń stýdent oqıdy. Olardyń 2 myńnan astamy bıyl qabyldanǵan. Al, qyrkúıek aıynda paıdalanýǵa beriletin jataqhanaǵa 500 stýdent ornalastyrylmaq. Stýdentter úıinde jastarǵa qajetti barlyq jaǵdaı jasalǵan. Oqý ornynyń ókili 8 gektar aýmaqta ornalasqan stýdenttik keshende taǵy 20 jataqhana, sonymen qatar sporttyq-turmystyq keshender salý josparlanǵanyn atap ótti.
Al, qala basshylarynyń sózinshe, Shymkentte 10 myń jasqa arnalǵan «Stýdentter qalashyǵyn» salý josparda bar. Onyń qurylysyn júrgizýge jergilikti kompanııalar qyzyǵýshylyq tanytyp otyr.
«Qazir qalashyqty salýǵa qatysatyn kompanııalardyń qarajatyn qaıtarý mehanızmderi qarastyrylyp jatyr. Búginde qalashyqtyń jobalaý-smetalyq qujattary daıyn. Eger QR Bilim mınıstrligi tarapynan bul joba qoldaý tapsa, qurylys 2-3 jyldyń kóleminde salynyp, tapsyrylady»,- deıdi Shymkent qalasy ákiminiń orynbasary Baýyrjan Mamytalıev. 
Respýblıkalyq keńestiń ókilderi sondaı-aq úshinshi megapolıstegi «7-20-25» baǵdarlamasy boıynsha ashylǵan «Biregeı aqparat ortalyǵyna» da bardy. Árbir otbasyna baspana alýdyń jańa múmkindikterin berý men turǵyn úıdi satyp alǵysy keletinderge kómektesý úshin úshin ashylǵan ortalyq Shymkent ákimdiginiń front-ofısinde ornalasqan. Munda bank ókilderi men qurylys kompanııalarynyń qyzmetkerleri turǵyndarǵa «7-20-25» baǵdarlamasymen baspanaly bolýdyń joldaryn túsindirip, qujattaryn qabyldaıdy. Degenmen, ázirge shaharda 36 myń adam úı kezeginde tursa da, atalǵan baǵdarlamamen nebári 28 adamnyń qujaty qabyldanǵan. Bul kórsetkishke kóńilderi tolmaǵan depýtattar jergilikti bılik basshylaryna kóbirek úgit-nasıhat jumystaryn júrgizip, týyndaǵan problemalardy ortaǵa salý kerektigin eskertti.
Respýblıkalyq keńestiń músheleri bul kúni «Aqjaıyq» yqshamaýdanyndaǵy turǵyn úılerdiń qurylysymen de tanysty. Aıta keteıik, qazirgi ýaqytta «7-20-25» baǵdarlamalaryn iske asyrýǵa segiz turǵyn úı kesheniniń 136 páteri daıyn, al ekinshi jartyjyldyqtyń sońyna deıin 275 páter paıdalanýǵa beriledi dep josparlanǵan. Olardyń basym kópshiligi - 2-3 bólmeli páterler. Sonymen birge, Ulttyq Banktiń derekteri boıynsha tamyz aıynyń ortasynda Shymkent qalasynda 662,6 mln teńgege turǵyn úı zaemdaryn alýǵa 77 ótinish kelip túsken.
«Bul baǵdarlama, birinshiden, áleýmettik jaǵdaıy tómen otbasylarǵa qol sozý bolyp tabylady. Ekinshiden, qurylys salasyna serpin berýdi kózdeıdi. Al, egir biz shartty tek osy 15 mln teńgemen ustasaq, erteń qurylys materıaldary qymbattaǵannan keıin birqatar kompanııalarsyz qalyp ketýimiz múmkin. Ol da durys emes. Sondyqtan baspana baǵasyn 15 mln teńgemen shektemeı, odan da joǵary kóterý jaǵyn usynamyz» ,- dedi qoǵamdyq keńestiń múshesi, QR Májilis depýtaty Azat Perýashev.
Delegatsııa músheleri sapar barysynda Shymkent qalasyndaǵy kásipkerler palatasynyń dırektory men ózge de óńirdegi belsendi kásipkerlerimen kezdesti. Prezıdenttiń «bes áleýmettik bastamasyn» júzege asyrýda bıznes ókilderin belsendi bolýǵa shaqyryp, olardyń máselelerin tyńdady. Basqosýda mıkrokredıttiń keńeıýine, jappaı kásipkerlikti damytýǵa jáne Shymkentte ónimdi jumysqa ornalasýǵa erekshe nazar aýdaryldy.
