Shymkentte 65 jastan asqandardyń qalada júrýine shekteý qoıyldy – Qaýly

ShYMKENT. QazAqparat – Shymkent qalasynyń bas memlekettik sanıtar dárigeri Ábdimanap Tólebaev karantın rejımin uzartý týraly jańa qaýly qabyldady, dep habarlaıdy QazAqparat tilshisi.

«Shymkent qalasynda karantın rejımin jáne koronavırýs ınfektsııasynyń taralýynyń aldyn alý jónindegi shekteý sharalary 2021 jyldyń 16 mamyrynan bastap epıdemıologııalyq jaǵdaı turaqtalǵansha uzartylsyn.Shymkent qalasynyń turǵyndaryna jáne qonaqtaryna adam kóp jınalatyn is-sharalardy (eske alý, týǵan kúnder, mereı toılar, shyǵaryp salý, qudalyq, toı, betashar jáne basqa) ótkizýge tyıym salynsyn», - dep jazylǵan jańa qaýlyda.

Sonymen birge, 65 jastan asqan adamdardyń qalada júrýi shekteledi.

Qoǵamdyq oryndarǵa (onyń ishinde qoǵamdyq kólikte) jáne qyzmetine ruqsat etilgen nysandarǵa barǵanda, ashyq aýada ornalasqan qoǵamdyq oryndarda (5 jasqa deıingi balalardy jáne ashyq aýada sportpen shuǵyldanýdy qospaǵanda) betperde kııý, áleýmettik qashyqtyqty saqtaý jáne antıseptıkterdi paıdalaný talaptary qatań saqtalady.

Bas sanıtarlyq dáriger qalanyń ákimi, memlekettik organdar, zańdy tulǵalar jáne kásipkerlik sýbektilerge karantın kezeńinde myna sharalardy qamtamasyz etýdi tapsyrdy.

«Shymkent qalasynda áleýmettik-ekonomıkalyq obektiler qyzmetine ruqsat berý jáne shekteý osy qaýlynyń 1 qosymshasyna sáıkes iske asyrylsyn. Saýda ortalyqtarynda, azyq-túlik jáne azyq-túlik emes dúkenderde, halyqqa qyzmet kórsetý salasyndaǵy nysandarda jáne halyq kóp jınalatyn oryndarda kúndelikti dezınfektsııalyq is-sharalar júrgizilsin. Sportshylar men jattyqtyrýshylar quramy COVID-19-ǵa qarsy vaktsınalaýdyń tolyq kýrsyn alǵan jaǵdaıda qalalyq komandalardy daıyndaý úshin oqý-jattyǵý jıyndaryn qaıta bastaýǵa ruqsat berilsin», - delingen qaýlyda.

Saıajaılar, skverler, jaǵalaýlar jáne Shymkent qalasyndaǵy avtovokzaldar men avtostantsııalar jumysy qalypty rejımde júrgiziledi.

Qaýlynyń tolyq mátinin Shymkent qalasy sanıtarlyq-epıdemıologııalyq baqylaý departamentiniń saıtynan oqýǵa bolady.