Shymkentte 58 nysan memleket menshigine alynǵan

ShYMKENT. QazAqparat - Shymkentte bıyl 42 áleýmettik nysan paıdalanýǵa berilgen. Sondaı-aq, 3 nysan jeke menshik ıeligine ótip, qala bıýdjeti 134 mıllıon teńgege tolyqty. Qala ákimi Ǵabıdolla Ábdirahymovtyń tóraǵalyǵymen ótken májiliste kommýnaldyq menshikti tıimdi paıdalaný jaıy keńinen talqylandy, dep habarlaıdy QazAqparat HAA tilshisi.

Qalalyq ekonomıka jáne qarjy bóliminiń basshysy Kenjebek Janbosynovtyń aıtýynsha, búginde qala aýmaǵynda 280 kommýnaldyq zańdy nysan bar. Tek bıyldyń ózinde 58 kommýnaldyq nysan memleket menshigi retinde qabyldanǵan.

Jıynda shahar basshysy bul saladaǵy jumystarǵa kóńili tolmaıtynyn jetkizdi. Ásirese, sala mamandaryna Saıram, Tólebı, Túlkibas aýdandarynan qala aýmaǵyna jańadan qosylǵan eldi mekenderindegi aýyz sý júıesin memleket menshigine alýdy qatań túrde tapsyrdy.

«Saıram aýdanynan qosylǵan eldi mekender aýmaǵynda áli kúnge 34 nysan memlekettik tirkeýden ótpegen. Bul saladaǵy jumystarǵa beı-jaılyq qareket tanytqany úshin jaýapty sala mamandaryna arnaıy shara kórilýi tıis», - dedi Ǵabıdolla Rahmatollauly.

Sondaı-aq, jıynda qala ákimi turǵyndardy kommýnaldyq qyzmetpen qamtyp otyrǵan monopolısterdiń qamsyz tirligin synǵa aldy.

«Qandaı da bir qajettilikpen asfalt ornyn shuńqyrǵa aınaldyrǵan jaýapty mekemeler jol qaýipsizdigin saqtaý úshin jarqyraýyq shamdar qyzmetin paıdalanyp, eskertý belgilerin ornatsyn jáne qazylǵan oryndy der kezinde qaıta qalpyna keltiretindeı bolsyn. Eger de atalmysh jumystar sapasyz oryndalatyn bolsa, qatań shara qoldanylady», - dedi jıyndy qorytyndylaǵan qala ákimi.