Shymkentte 51 otbasyǵa turǵyn úı kómegi retinde memleket qarjysy zańsyz berilip kelgen - Prokýratýra
ASTANA. 3 maýsym. QazAqparat /Qanat Mámetqazyuly/ - Jaqynda Ońtústik Qazaqstan oblysy Shymkent qalasynyń prokýratýrasy Qalalyq jumyspen qamtý jáne áleýmettik baǵdarlamalar bóliminde halyqty áleýmettik qorǵaý zańnamasy talaptarynyń saqtalýyna tekserý júrgizgen bolatyn.
Nátıjesinde qaladaǵy 51 otbasyǵa turǵyn úı kómegi retinde jergilikti bıýdjetten memleket qarajaty zańsyz berilip kelgeni anyqtaldy.
Bul týraly QR Bas prokýratýrasynyń baspasóz qyzmetinen habarlady.
«Turǵyn úı kómegin kórsetý týraly» Erejeniń 4 tarmaǵyna sáıkes, turǵyn úı kómegi jergilikti bıýdjet qarajaty esebinen osy eldi mekende turaqty turatyn az qamtylǵan otbasylarǵa beriledi. Alaıda, Shymkent qalasynyń jumyspen qamtý jáne áleýmettik baǵdarlamalar bóliminiń qyzmetkerleri zań talaptaryn buzǵan. Atap aıtqanda, turǵyn úı kómegin alǵan 51 otbasynyń jeke kásipker retinde salyq komıtetinde tirkelgeni jáne olardyń attarynda birneshe jyljymaıtyn múlik pen avtokólikteri bar ekendigi anyqtaldy», delingen baspasóz aıǵaǵynda.
Naqtylasaq, prokýrorlar ІІD JPB-nan tıisti málimetterdi ala otyryp, az qamtylǵan otbasy retinde kómek alǵan F.Hasannyń atynda 2 avtokólik tirkelse, onyń kúıeýi R.Osmannyń atynda 26 avtokólik tirkelgenin anyqtady. Dál osylaı, turǵyn úı kómegin alǵan N.Osmannyń kúıeýi A.Osmannyń atynda 15 avtokóliktiń tirkelgeni belgili bolǵan. Budan basqa, OQO Ádilet departamentiniń málimetine sáıkes turǵyn úı kómegin alǵan R.Mýhabaıdyń atynda Bostandyq kóshesinde páter tirkelse, kúıeýi P.Tanshanyń atynda Samal-3 móltek aýdanynda jer ýchaskesi tirkelgen.
Jalpylama alǵanda, 2007 - 2010 jyldar aralyǵynda ózderiniń kásipkerlik qyzmetpen aınalysqanyn jáne tabys kózderin jasyryp, az qamtylǵan otbasy retinde 51 otbasy memleketten turǵyn úı kómegi boıynsha 3 825 334 teńge alǵan. Al, atalǵan máselege jaýapty bólim qyzmetkerleri otbasylardan zań talaptaryna sáıkes birde-bir málimet suramaı, memlekettik qarajattyń zańsyz jumsalýyna jol berip kelgen. Tekserý nátıjesinde aýdan prokýratýrasymen Shymkent qalasy jumyspen qamtý jáne áleýmettik baǵdarlamalar bólimi bastyǵynyń jáne Shymkent qalasy ákiminiń atyna zań buzýshylyqtar saldarynan keltirilgen shyǵyndy memleketke qaıtarý, kináli qyzmetkerlerdi qatań jaýapkershilikke tartý týraly usynys engizilgen.
