Shymkentte 5 jasar búldirshin fıtnes ortalyqtyń basseınine batyp ketti

ShYMKENT. QazAqparat - Shymkentte bes jasar búldirshin fıtnes ortalyǵynyń basseınine batyp ketti. Ol eresekterdiń qaraýynsyz qalyp, sýda tunshyǵyp qalǵan, dep habarlaıdy QazAqparat tilshisi.

Qalalyq TJD baspasóz qyzmetiniń málimetinshe, qaıǵyly jaǵdaı keshe keshkisin saǵat 17.25 shamasrynda «KASIET» fıtnes-klýbynda bolǵan.

Qutqarý qyzmetiniń daǵdarys jaǵdaılardy basqarý basqarmasyna 2018 jyly týǵan búldirshinniń balalar basseınine batyp ketkeni týraly habar kelip túsken.

«Oqıǵa ornyna kelgen mamandar balanyń basseınde shomylyp júrip, sýǵa batyp ketkenin anyqtaǵan. Basseınniń tereńdigi - 1,2 metr, al eni - 5 metr. Qazir qaıǵyly oqıǵanyń mán-jaıy anyqtalyp jatyr. Sot-medıtsınalyq saraptama taǵaıyndalǵan» delingen habarlamada.

Foto: Shymkent q. TJD