Shymkentte 5 jasar bala kópqabatty úıdiń terezesinen qulap ketti
8 tamyz kúni keshki 22.30 shamasynda ál-Farabı aýdany Tereshkova kóshesindegi 5 qabatty turǵyn úıde eresekterdiń qaraýynsyz qalǵan 2016 jyly týǵan bala ekinshi qabattaǵy páterdiń terezesinen qulap, aýrýhanaǵa jatqyzylǵan. Jaǵdaıy - ortasha aýyr.
Shymkent qalalyq polıtsııa departamentiniń málimetine sensek, esepti kezeńde qalada 3 bala osylaı kópqabatty úıdiń terezesinen qulaǵan.
Onyń ishinde bir bala qaıtys boldy, qalǵan ekeýi jaraqat alyp, aýrýhanaǵa túsken.
Ótken jylmen salystyrǵanda osy kezeńde terezeden qulaýǵa baılanysty jazataıym oqıǵalar sanynyń óskeni baıqalady.
Polıtseıler ata-analarǵa barynsha muqııat bolyp, balalardy qaraýsyz qaldyrmaý kerektigin eske salady.
Balalardyń terezeden qulaýynyń aldyn alý úshin myna erejelerdi saqtaý kerek:
- Terezeni ashyq qaldyrmaý kerek, óıtkeni bir sekýndqa bolsyn alańdap qalý balanyń ómirindegi sońǵy sát nemese máńgi jazym bolyp qalýy múmkin.
- Tereze toryn tıisti qorǵaýsyz qoldanýǵa bolmaıdy. Bala aldynda belgili bir kedergini kóredi jáne ol oǵan senimdi súıenedi, al onyń saldarynan búldirshin bir jasar balanyń da salmaǵyn kótere almaıtyn tormen birge qulap túsýi múmkin.
- Balany terezeniń janynda oınap otyrǵan kezinde qaraýsyz qaldyrýǵa bolmaıdy.