Shymkentte 5 jáne 8 jasar eki qyzdy zorlamaq bolǵan kúdikti ustaldy

ShYMKENT. QazAqparat - Shymkentte kámeletke tolmaǵan eki qyzǵa qatysty seksýaldyq sıpattaǵy áreketter jasaǵan kúdikti ustaldy, dep habarlaıdy QazAqparat Polisia.kz portalyna silteme jasap.

11 maýsym kúni polıtsııaǵa bireý jasóspirim qyzdardy zorlamaq bolǵany týraly aqparat túsken. Atalǵan jaıt boıynsha QR QK 121-babynyń 4-bóligimen sotqa deıingi tergeý júrip jatyr.

Ol qylmystyń sanktsııasy belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, jıyrma jylǵa nemese ómir boıyna bas bostandyǵynan aıyrýdy kózdeıdi.

Sol kúni polıtsııa qyzmetkerleri 5 jastaǵy jáne 8 jastaǵy kámeletke tolmaǵan qyzdarǵa qatysty jasalǵan qylmysty ashý úshin Shymkent qalasy polıtsııa departamentiniń qyzmetkerlerinen quralǵan arnaıy jedel tergeý tobyn qurdy.

Kúdiktiniń júrgen jerin anyqtaý maqsatynda polıtsııa qyzmetkerleri jedel-izdestirý is-sharalaryn ótkizip, qylmys oryn alǵan aýdandaǵy turǵyn úılerdi tekserdi. Jedel-tergeý tobynyń jedel is-qımylynyń, sondaı-aq azamattardyń kómeginiń arqasynda atalǵan qylmystardy jasaǵan kúdikti ustalyp, ýaqytsha ustaý ızolıatoryna qamaldy.

Ol jergilikti turǵyn bolyp shyqty. Buryn sottalmaǵan, jumyssyz, úılenbegen. Ustalǵan azamat óz qylmysyn moıyndady.

Tıisti saraptamalar taǵaıyndaldy, olardyń nátıjesi boıynsha protsessýaldyq sheshim qabyldanady.

Aıta ketý kerek, eki jaıt ta bir kúni, ártúrli jerlerde jáne ártúrli ýaqytta jasaldy. Kúdikti ata-anasynyń baqylaýynsyz júrgenin paıdalanyp, kámeletke tolmaǵan balalardy túrli sendirip, tasa jerge alyp ketken.