Shymkentte 5 myńǵa tarta oqýshy oqý jylyn jańa ǵımaratta bastaıdy
Sala mamandardyń sózinshe, aǵymdaǵy jyly shym shahardaǵy bilim mekemeleriniń sany 228-ge jetip otyr. Onyń 132-si mektep bolsa, 88-i balabaqsha men 8-i mektepten tys mekemeler. Endi bilim uıalarynyń №125,128,129 úsh jańa mektep tolyqtyrady. Sonymen qatar, №69 jáne №97 mektepteriniń ǵımaraty jańartylyp otyr. Al, úsh aýysymda bilim beretin mektepter sany 8 bolsa, jańa oqý jylynda «Dostyq», «Aqjaıyq», «Jańatalap», «Qaınarbulaq», «Sáýle» shaǵynaýdandaryndaǵy 5 jańa mektep paıdalanýǵa berilmek. Sonda 4 800 oqýshy qalypty bilim berý júıesine kóshedi. Sol sııaqty «Tasken» turǵyn úı alabyndaǵy úsh aýysymdyq mekteptiń máselesi 2018 jyly sheshimin tabatyn bolady. Bilim bólimi bergen málimetke sáıkes, jeltoqsan aıynda Ákimshilik iskerlik ortalyǵyndaǵy 1200 oryndyq jańa mektep ashylatyn bolady. Sondaı-aq, «Samal-3» shaǵynaýdanynda da jer telimi rásimdelip, oqýshylar úshin jańa bilim oshaǵynyń jobalyq-smetalyq qujattary ázirlenýde. Onyń qurylysyn 2018 jyly bastap, 2019 jyly paıdalanýǵa berý josparlanǵan. Bul rette qalalyq bilim bóliminiń basshysy Janat Tájıeva bala sany artyq 5 mekteptiń baryn aıtady.
«Bul mektepterdi úsh aýysymdyq oqý júıesine kóshirmeı-aq, oqýshylarǵa bilim berýin jeńildetý maqsatynda jaqyn mańdaǵy basqa mektepterden synyp bólmelerin qarastyrdyq. Atap aıtqanda, №9, 23 mektep oqýshylaryna №14, 20 mektepterden synyp bólmeleri beriletin bolady. Al №1, 46, 65 mektepterge jalǵa alýǵa ǵımarattar izdestirilýde», - deıdi qalalyq bilim bóliminiń basshysy.
Janat Tájıevanyń aıtýynsha, №1 mekteptiń janynan qosymsha qurylys salý úshin zerdeleý jumystary júrgizilýde. Osyǵan uqsas №65 mekteptegi máseleni retke keltirý úshin mektep janynan qosymsha 0,72 ga jer memleket muqtajdyǵyna qaıtarylǵan. Qazirgi tańda rásimdeý jumystary josparlanyp otyr eken. Júıeli jumystardyń nátıjesinde 2020 jylǵa deıin shaharda úsh aýysymdyq mektepterdiń máselesi tolyq sheshimin tabady.
