Shymkentte 5 adamnyń ólimine sebepshi bolǵan avtobýsty júrgizýshi qol tejegishine qoımaǵan

ShYMKENT. QazAqparat – Shymkentte avtgobýs apatynan aýyr jaraqat alǵan besinshi adam aýrýhanada jantásilim etti. Atalmysh oqıǵaǵa baılanysty Shymkent qalalyq jolaýshylar kóligi jáne avtomobıl joldary basqarma basshysy Muqtar Qoqanbaev barlyq tasymaldaýshy kompanııa basshylarymen arnaıy jedel jıyn ótkizdi, dep habarlaıdy QazAqparat tilshisi.

Jıyn barysynda basqarma tarapynan tasymaldaýshy kompanııalarǵa atalǵan oqıǵa boıynsha júrgizýshilerdiń nazaryna jetkizý men jol júrisi, jolaýshylar tasymaldaý qaǵıdalarynyń talaptary men júrgizýshiniń mindetteri týraly qosymsha jáne turaqty túrde nusqaýlyqtardy ótkizý tapsyryldy.

Júrgizýshiler quramy arasynda kezekten tys attestatsııalaý sharalaryn ótkizý, turaqty túrde baǵyttardaǵy jelilik baqylaýdy kúsheıtý mindetteldi.

Sondaı-aq qaza tapqan otbasylardyń jaqyndaryna avtopark basshysy tarapynan barlyq emdeý men janaza shyǵyndaryn óteýge kómek beriletinin atap ótti.

Atalǵan jol-kólik apaty týraly aıtqan jaýaptylar júrgizýshiniń qoǵamdyq kólikti qol tejegishine qoıýdy umytyp, ájethanaǵa ketkenin jetkizdi. Keshe polıtsııa avtobýstyń tejegishke qoıylǵanyn habarlaǵan edi.

Aıta keteıik, qazirgi tańda Shymkent qalasynda 77 turaqty qalalyq marshrýt qyzmet kórsetedi, kúndelikti marshrýttarǵa 877 avtobýs shyǵady.

Jeke menshik nysanyndaǵy 10 kompanııa jolaýshylardy tasymaldaý qyzmetin kórsetip júr.

Aldaǵy ýaqytta kúsheıtilgen reıd júrgizilip, kompanııa basshylaryna tıisti tapsyrmalar berdi.

Eske salaıyq, kúni keshe qaladaǵy Nazarbekov jáne Báıterekov kósheleriniń qıylysynda jantúrshigerlik jol apaty boldy.

Júrgizýshisi joq avtobýs joldyń qarama qarsy baǵytyna shyǵyp, 6 adamdy qaǵyp ketken bolatyn.

Saldarynan 2 áıel men jasósipirim oqıǵa ornynda til tartpaı ketse, al tórtinshi adam jansaqtaý bóliminde kóz jumdy.

Besinshi adam aýrýhana tóseginde jantásilim etti.

Jol kólik oqıǵasynan bir boıjetken tiri qaldy. Olar jaıaý júrginshiler jolaǵy arqyly joldyń qarsy betine ótpek bolǵan edi.

Jol apatynyń kadrlary birneshe beınebaqylaý kamerasyna túsip qalǵan. Qazirgi tańda quqyq qorǵaý organdary tarapynan tergeý júrgizilip jatyr.