Shymkentte 46 jastaǵy áıel gazdan ýlanyp kóz jumdy
ShYMKENT. QazAqparat - Shymkentte 46 jastaǵy áıel gazdan ýlanyp kóz jumdy. Bul demalys kúnderi ıisten ýlanyp, qaza tapqan úshinshi adam bolyp otyr, dep habarlaıdy QazAqparat tilshisi.
Gaz taratýshy mekeme mamandarynyń habarlaýynsha, qaıǵyly jaǵdaı 9 naýryz kúni Jaılaý shaǵyn aýdanynda bolǵan. Turǵyndar jeke turǵyn úılerdiń birinde gazdan ýlanǵan 42 jastaǵy áıeldi taýyp alyp, jedel járdem qyzmetin shaqyrtqan. Alaıda dárigerler jetkenshe turǵyn kóz jumdy.
Oqıǵa ornyna kelgen avarııalyq brıgada jýyný bólmesinde sý jylytatyn qondyrǵynyń durys ornatylmaǵanyn anyqtaǵan. Saldarynan gazdyń ıisi syrtqa emes, ishke qaraı ketken. Bólmede aýa almasatyn da jaǵdaı jasalmaǵany belgili boldy.
Tekserý kezinde shaǵyn tereze de jabyq turǵan. Mamandar osy jaıttardyń barlyǵy gazdan ýlanýǵa sebep bolýy múmkin dep boljap otyr. Naqty qorytyndy tekserý sharalary aıaqtalǵan soń shyǵarylady.
Aıta keteıik, demalys kúnderi Shymkenttegi kópqbabatty úılerdiń birinde eki adam gazdan ýlanyp qaıtys boldy. Olar 43 jastaǵy áıel men 51 jastaǵy er adam bolǵan.
Aıta keteıik, jyl basynan beri óńirde gazdan ýlanýǵa qatysty 9 oqıǵa tirkelip, odan 18 adam zardap shekti. Qaıtys bolǵan 14 adamnyń ekeýi bala.
