Shymkentte 46 mln teńge qaryzyn tólemeı, qashyp júrgen azamat ustaldy

ShYMKENT. QazAqparat – Shymkentte 46 mln teńge salyq tólemegeni úshin izdeýde júrgen turǵyndy prokýrorlar izdep tapty. Qadaǵalaý organynyń ókilderi seriktestik dırektorynyń jasyrynǵan jerin áleýmettik jeli arqyly anyqtaǵan, dep habarlaıdy QazAqparat tilshisi.

Qalalyq prokýratýranyń baspasóz qyzmeti «O» esimdi boryshkerge 2018 jyldyń qyrkúıek aıynda izdeý jarııalaǵanyn jarııa etti. Onyn memleket aldyndaǵy qaryzy 46 mln teńgeden asyp ketken. Jekemenshik seriktestikke jetekshilik ete tura ol 2011-2015 jyldar aralyǵynda tabys salyǵyn tólemeı kelgen. Keıinnen sot úkimimen ákimshilik jazaǵa tartylǵan. Alaıda kásipker tabylmaǵan soń, atqarýshylyq is-áreketter ýaqytsha toqtatylǵan. Odan beri bir jyldan asa ýaqyt ótse de, boryshkerdiń júrgen jeri anyqtalmaǵan.

«Qala prokýratýrasy aqparattyq júıeler men áleýmettik jeliler arqyly boryshkerdiń júrgen jerin anyqtap, sol jerge ózderi barǵan. Sóıtip qashqyn kásipkerdi ustap, dereý sot oryndaýshylaryna jetkizdi. Kelesi kúni boryshkerge qatysty sot aktisin oryndamaǵany úshin ákimshilik is qozǵalyp, 12 625 teńge kóleminde aıyppul salyndy. Boryshker qalalyq mamandandyrylǵan ákimshilik sotynyń qaýlysyna saı ÁQBtK 669-babymen kináli dep tanyldy. Sot sheshiminiń ári qaraı oryndalýy prokýrorlardyń baqylaýynda bolady» delingen habarlamada.