Shymkentte 43 áıel «jezókshe» esebine qoıyldy

Shymkentte 43 áıel «jezókshe» esebine alyndy, dep habarlaıdy QazAqparat tilshisi.

«Stop-trafık» jedel-profılaktıkalyq is-sharasyna Shymkent qalasy polıtsııa departamentiniń uıymdasqan qylmysqa qarsy kúres basqarmasynyń barlyq jeke quramy jumyldyryldy.

Tártip saqshylary qala aýmaǵynda reıdtik is-sharalar júrgizip, áýejaı, temir jol vokzaly, jaldamaly páterler men oıyn -saýyq ortalyqtaryna, saýnalar men fermalarǵa tekserý jumystaryn júrgizdi.

Nátıjesinde, eki kún ishinde jezókshelikpen aınalysýǵa úı-jaı usynýdyń 8 deregi anyqtalyp, QR ÁQBtK-niń 450-babymen hattama toltyryldy. Sondaı-aq, ákimshilik kodekstiń 449-baby «Qoǵamdyq oryndarda tıisý» boıynsha 48 turǵyn jaýapqa tartylsa, 43 áıel «jezókshe» esebine qoıyldy.

«Búgin profılaktıkalyq sharanyń sońǵy kúni. Desek te, tártip saqshylary atalǵan qylmyspen kúres jumystaryn odan ári jandandyra bermek. Adam saýdasy qylmysynyń kýási nemese qurbany bolǵan jaǵdaıda birden 102 arnasyna habarlasyńyzdar» - delingen Shymkent qalasy polıtsııa departamentiniń baspasóz qyzmeti taratqan aqparatta.