Shymkentte 400 myń teńge para alǵan polıtseı 8 mln teńge aıyppul tóleıdi
Sybaılas jemqorlyqqa qarsy qyzmet Shymkent qalalyq polıtsııa departamenti ózindik qaýipsizdik basqarmasynyń jedel ázirlemeler jáne arnaıy is-sharalar tobynyń jedel ýákili F. Sháripbaıulyna qatysty tergeý júrgizdi.
«Jedel ýákil Shymkent qalasy jol polıtsııasy serjantynan medıtsınalyq kýálandyrýdyń oń qorytyndysyn alýǵa kómek kórsetkeni úshin jáne qyzmetten bosatpaǵany úshin 400 myń teńge somasynda aqshalaı qarajat aldy dep aıyptady. Sonymen qatar, F. Sháripbaıuly ustalǵan kezde, onyń avtokóligin tintý barysynda 9 mm kalıbrli «STREAMER-1014» gaz tapanshasy tabyldy» delingen habarlamada.
30 qańtarda Shymkent qalasy ál-Farabı aýdandyq sotynyń úkimimen F. Sháripbaıuly alaıaqtyq jáne qarý-jaraqtyń zańsyz aınalymy úshin kináli dep tanylyp, oǵan 8 mln teńge aıyppul salyndy.
Ol «kapıtan» arnaıy ataǵynan aıyrylyp, memlekettik qyzmette laýazym atqarý quqyǵynan aıyryldy.
