Shymkentte 4 jigit jergilikti turǵyndy qorqytyp, 15 myń AQSh dollaryn talap etken
Oblystyq ІІD baspasóz qyzmetiniń málimetinshe, atalǵan qylmys ótken jyldyń 27 jeltoqsan kúni oryn alǵan. Orta jastaǵy qala turǵyny Qarataý polıtsııa bólimine aryzdanyp, belgisiz tórt azamattyń ózin bopsalap jatqanyn aıtqan. Tipti kúsh qoldanyp, qorqytý arqyly 15 myń AQSh dollaryn talap etipti. Osydaı keıin tártip saqshylary jedel-izdestirý jumystaryn júrgizip, kúdikti degen tórt adam ustalǵan. Olar 30-40 jas aralyǵyndaǵy Shymkent qalasynyń turǵyndary bolyp shyqty.
«Tergep-tekserý jumystary barysynda kúdiktilerdiń ońaı jolmen aqsha tabýdy kózdegeni anyqtaldy. Osy maqsatta olar jábirlenýshini eshqandaı qaryzy bolmasa da, qala syrtyna alyp barǵan. Uryp-soǵý arqyly 15 myń AQSh dollaryn talap etken. Ári aqshany bir kúnniń ishinde jetkizýin buıyrǵan. Tergeý kezinde kúdiktiler jasaǵan qylmysyn tolyq moıyndady» delingen habarlamada.
Qazirgi tańda seziktilerdiń ústinen Qylmystyq kodekstiń «Qorqytyp alý» babymen is qozǵalyp, tergeý amaldary júrgizilýde. Tórteýi de ýaqytsha ustaý abaqtysyna qamaýǵa alynǵan.