Shymkentte 4 mln teńgeniń jylý jáne eseptegish quraldary urlandy
ShYMKENT. QazAqparat - Shymkentte jańadan salynǵan turǵyn úılerdiń jylý jáne eseptegish quraldaryn urlap júrgen sezikti ustaldy. Qazirdiń ózinde kúdiktiniń jábirlenýshilerge 4 mln teńge kóleminde shyǵyn keltirgeni anyqtalyp otyr, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, kúdikti urlyqty aldyn ala josparlap jasap otyrǵan. Ol aldymen Qarataý aýdanyndaǵy bir úıge jasyryn kirip, 1,5 mıllıon teńgeniń múlkin qoldy etken. Osydan keıin tártip saqshylary seziktini izdestirip, aqyry qolǵa túsirgen. Tergeý barysynda ustalǵan kúdiktiniń bul qylmystan bólek taǵy 4 urlyq deregine qatystylyǵy anyqtaldy.
«Kúdikti úılerdiń ıesiz, qaraýsyz qalǵanyna tolyq kóz jetkizgennen keıin tereze arqyly ishke kirip otyrǵan. Sóıtip gaz peshterin, batareıalar men eseptegish quraldaryn urlap kelgen» delingen baspasóz qyzmeti taratqan habarlamada.
Qazirgi tańda kúdikti qamaýǵa alynyp, onyń ústinen Qylmystyq kodekstiń «Urlyq» babymen is qozǵaldy. Sotqa deıingi tergep-tekserý amaldary júrgizilýde.
