Shymkentte 4 aı buryn joǵalyp ketken bala qaıda júrgenin aıtyp berdi

ShYMKENT. QazAqparat - Shymkentte 4 aı  boıy joǵalyp ketken bala qaıda júrgeni belgili boldy. 12 jastaǵy Rýslan Nortýraev polıtsııaǵa ózi kelip,  osy ýaqyt aralyǵynda qaıda bolǵanyn jáne úıden nelikten ketkenin tolyǵymen aıtyp bergen, dep habarlaıdy QazAqparat tilshisi.

Shymkent qalalyq Polıtsııa departamenti baspasóz qyzmetiniń málimetinshe, jetinshi synyp oqýshysy 20 qarasha kúni  Ál-Farabı aýdandyq polıtsııa basqarmasynyń kezekshi bólimine kelgen. 

«Rýslannyń sózinshe, ákesi men ógeı sheshesi oǵan kúsh qoldanyp, únemi qysym kórsetken. Sondyqtan ol úıinen ketip qalǵan. Ákesi onyń joǵalǵandyǵy týraly polıtsııaǵa tek 1,5 aı ótkennen soń ǵana habarlaǵan. Polıtseıler shaǵym túsken soń eriktilermen birlesip Rýslandy izdeýge kirisken», - delingen habarlamada.

Qazirgi tańda polıtsııa tarapynan  Rýslannyń ákesin  jaýapkershilikke tartý  týraly másele qarastyrylýda. Al, balanyń ózi psıholog-dárigerlerdiń baqylaýyna alyndy. Kámelet jasqa tolmaǵandardyń isteri jónindegi ınspektor jasóspirimniń aldaǵy kezde osy otbasymen qalý -qalmaýy boıynsha anyqtaý sharalaryn júrgizýde.

Aıta keteıik, buǵan deıin áleýmettik jelilerde 2006 jylǵy Rýslan Nortýraevtyń joǵalyp ketkeni jóninde habar taraǵan bolatyn. Onda balanyń 22 shildede iz-túzsiz ketkeni aıtylǵan.