Shymkentte 38 polıtsııa qyzmetkerine qatysty sot otyrysy bastaldy
Aıyptalýshylar men qorǵaýshylardyń sany kóp bolýyna baılanysty sot otyrysy oblystyq Kóshi-qon polıtsııasynyń akt zalynda ótýde. Onda terezeler temir tormen qorshalyp, arnaıy dybys quraldarymen jabdyqtalǵan. Sot otyrysy kezinde aıyptalyp otyrǵan ishki ister qyzmetkerleri ózderin BAQ-nyń túsirýine qarsylyq bildirdi. Soǵan baılanysty sýdıa Shaıhıdınov sot otyrysynyń bas jaǵyna ǵana qatysýlaryna ruqsat berdi. Alǵashqy sot protsesinde ustalǵandar men olardyń qorǵaýshylary tanystyryldy. Sonyń ózi túske deıingi ýaqytty aldy. Іske tóraǵalyq etýshi sýdıanyń sózinshe, qylmystyq is 1534 tomnan turady. Aıyptaý aktisiniń ózi 40 tomǵa jetken. Onymen prokýrorlar aıyptalýshylardy dúısenbi kúni tanystyrady dep kútilýde.
Esterińizge sala keteıik, 2016 jyldyń shilde aıynda oblystyq ІІD ákimshilik polıtsııasynyń tirkeý-emtıhan bóliminde arnaıy operatsııa júrgizilip, nátıjesinde basshysynan bastap qyzmetkerleri ustalǵan bolatyn. Keıinnen osy qylmysqa qatysy bar degen kúdikpen 2017 jyldyń shilde aıyna deıin Saıram, Báıdibek, Maqtaaral, Saryaǵash aýdandary men Túrkistan qalalyq ishki ister basqarmalarynyń qyzmetkerleri ustaldy. Aıyptalýshylardyń arasynda 2015 jáne 2016 jyly zeınetkerlikke shyǵyp ketken polıtsııa qyzmetkerleri de bar. Eki jyldan asa ýaqyt júrgizilgen tergeý kezinde ustalǵandarǵa uıymdasqan qylmystyq top quryp, oǵan jetekshilik etti, para aldy jáne berdi, qyzmet babyn asyra paıdalana otyryp, sybaılas jemqorlyq qylmystaryn jasady degen aıyptar taǵyldy. Sondaı-aq, burynǵy polıtsııa qyzmetkerlerine qazaqstandyq jáne reseılik jalǵan nómirler men mórler jasady, ony paıdalandy jáne jábirlenýshilerge mıllıardtaǵan teńge shyǵyn keltirdi degen kiná taǵylýda. Búgingi tańda osy qylmystardyń arqasynda memleketke baj salyǵyn tólemegen myńǵa jýyq kólik anyqtalyp, 4,4 mlrd teńge shyǵyn kelgeni belgili boldy.
