Shymkentte 30 myńnan astam adam turǵyn úı kezeginde tur
ShYMKENT. QazAqparat - Shymkent qalasynyń ózinde 30 myńnan astam adam turǵyn úı kezeginde tur. Al, olardy baspanamen qamtý merzimi áli naqtylanbaǵan. Bul týraly oblys ákimdiginiń alqa májilisinde shahar basshysy Ǵabıdolla Ábdirahymov málim etti, dep habarlaıdy QazAqparat HAA tilshisi.
Májiliste sóz alǵan Shymkent qalasynyń ákimi Ǵabıdolla Ábdirahymov turǵyn úı salýǵa «Ońtústik ÁKK» arqyly ınvestorlar tartý kerektigin alǵa tartty.
«Bos paıdalanbaı jatqan jerler kóp. Jer ıeleri kópqabatty turǵyn úı salýy kerek, shamasy jetpese jerdi memleketke qaıtarýy tıis», - dedi qala basshysy.
Jıynda memlekettik «Nurly jer» turǵyn úı baǵdarlamasynyń óńirdegi iske asyrylý barysyn baıandaǵan Salyhan Sabyruly oblys aýmaǵynda jyl sońyna deıin 113 kópqabatty turǵyn úı paıdalanýǵa beriletinin aıtty. Onyń sózinshe bıyl 524,5 myń sharshy metrdi quraıtyn 169 turǵyn úıdiń qurylysy júrgiziledi. Budan ózge Salyhan Polatov osy saladaǵy negizgi bes baǵytqa toqtaldy.
Birinshi baǵyt - ıpotekalyq nesıe berýdiń qoljetimdiligin arttyrý bolsa, kelesi baǵyty - jeke qurylys salýshylardy yntalandyrý. Munda jeke qurylys salýshylardy yntalandyrý maqsatynda ekinshi deńgeıdegi bankterge nesıe berý kólemderin keńeıtý arqyly qurylys kompanııalaryn qarjy resýrstarymen qamtamasyz etý negizge alynǵan. Al, turǵyn úı qurylys jınaqtary júıesi arqyly kredıttik baspana salý úshinshi baǵytta kózdelgen. Halyqtyń áleýmettik álsiz toptary úshin jalǵa beriletin turǵyn úı qurylysy tórtinshi baǵytta. Al, baǵdarlamadaǵy besinshi baǵyty - jeke turǵyn úı qurylysyn damytý. Bul baǵyttyń sheńberinde kóptegen ozyq álemdik qalalardyń úlgisinde biryńǵaı sáýlettik stılde jeke turǵyn úıler salýǵa basymdyq beriledi. Sondaı-aq, ótken jyly oblysta 242 turǵyn úıdiń qurylysy júrgizilip,131 turǵyn úı paıdalanýǵa berildi. Qalǵan 111 turǵyn úı qurylysy 2017 jylǵa ótpeli bolǵan.
Aıta keteıik, ınfraqurylym nysandarynyń qurylysy boıynsha Respýblıkalyq bıýdjetten 7,8 mlrd. teńge bólindi. Atalǵan qarjyǵa oblysta 14 nysannyń qurylys jumystary júrgiziledi. Aǵymdaǵy jyly 3 nysandy paıdalanýǵa tapsyrý josparlansa, 11 nysannyń qurylysy kelesi jylǵa ótpeli. Jyl qortyndysy boıynsha 6119 jeke turǵyn úılerge jáne 384 kóp qabatty turǵyn úıge ınfraqurylym júıeleriniń qurylysy júrgiziledi.
Baıandamashylardyń esebin tyńdaǵan oblys ákimi qurylys salasyndaǵy atqarylyp jatqan is-sharalarǵa kóńili tolmaıtynyn jetkizip, atalǵan sala basshylaryn synǵa aldy. Sonymen qatar úı turǵyzǵanda ońtústiktiń aýa raıy da nazardan tys qalmaýyn eskertti.
«Turǵyn úı qurylysyna jeke ınvestorlar tartýdy qolǵa alyp, kópqabatty baspanalardyń qataryn kóbeıtýimiz qajet. Qam kesekten jer úı salýdy toqtatyp, seısmıkalyq talaptarǵa saı etken abzal. Sáýlet , qurylys, memlekettik sáýlet baqylaý basqarmalary birlesip, turǵyn úı qurylysyn damytýdyń jańa keshendi baǵdarlamasyn ázirleýi tıis. Bul iske aýdan, qala basshylary da atsalysýy kerek. Eger dəl qazirgi qalpymen kete berse, 117 myń gektardy alyp jatqan Shymkent úlken aýylǵa aınalyp ketedi. Qalanyń sáýletti kelbetin qalypqa keltirý úshin birlesip jumys atqarýdy tapsyramyn», - dedi Janseıit Qanseıituly.
