Shymkentte 3 jasar qyzdy zorlaý deregi boıynsha qylmystyq is qozǵaldy
Búldirshinniń ákesi tilshilerge bergen suhbatynda keleńsiz jaǵdaıdyń «Tulpar» balabaqshasynda bolǵanyn aıtty.
«Sol kúni qyzymdy áıelim baqshadan alyp kelgen. Úıde dáretke shyqqysy keldi. Ol alyp baryp, ish kıimin sheshkende qan izderin kórip qalǵan. Qorqyp ketip, maǵan habarlasty. Bastapqy kezde ne bolǵanyn suraǵanda eshteńe aıtpady. Keıinnen bul jaǵdaıdyń topqa kire beristegi bólmede bolǵanyn túsindirdi. Ol artqy jaǵynan boıy aǵasynan bıikteý, biraq anasynan qysqaraq bireý kelip, ish kıimin sheshkenin aıtty. Sóıtip belinen tómen jaqqa qolyn tyqty dep túsindirdi. Qatty aýyrǵany sonsha, qyzym jylap jibergen. «Qolyńdy tart» dep aıqaıladym deıdi. Sol kezde ol adam qashyp ketipti. Biraq tárbıeshisine eshteńe aıtpaǵan», - deıdi búldirshinniń ákesi.
Balaqaıdyń ata-anasy sol kúni keshkisin úıge polıtseılerdi shaqyrtyp, balabaqshaǵa barǵan. Qazir Shymkenttiń PD osy is boıynsha tergeý amaldary júrip jatqanyn málimdedi.
«25 jeltoqsan kúni Shymkent qalasynyń turǵyny Qarataý aýdandyq polıtsııa basqarmasyna aryzdanǵan. Qazirgi tańda osy is boıynsha QR QK-niń 124-baby, ıaǵnı «Jas balalardy azǵyndyq jolǵa túsirý» boıynsha sotqa deıingi tergeý bastaldy. Tıisti saraptamalar taǵaıyndaldy. QR QPK-niń 201 jáne QR QK-niń 147-baptaryna sáıkes sotqa deıingi tergeý derekteri jarııa etýge jatpaıdy» delingen habarlamada.
Aıta keteıik, kúni keshe prokýrorlar alǵashqy úılestirý keńesin ótkizip, qalada kámelet jasyna tolmaǵandardyń jynystyq qol suqpaýshylyǵyna qatysty qylmystar sany eki esege artqanyn aıtqan bolatyn. Statıstıkalyq málimetterge sáıkes, mundaı qylmystar ótken jyldyń sáıkes kezeńimen salystyrǵanda eki ese nemese 18-den 43-ke kóbeıgen.