Shymkentte 3 jasar bala kóliktiń tejegishine quıatyn suıyqtyqty iship ýlanyp qaldy

ASTANA. QazAqparat - Shymkentte 3 jasar bala kólik motoryna arnalǵan suıyqtyqty iship, aýyr halde aýrýhanaǵa tústi. Balanyń aýzy, óńeshi, asqazany kúıip qalǵan, degen dıagnoz qoıyldy, dep habarlaıdy QazAqparat Otyrar.kz portalyna silteme jasap.

3 jasar Arman qazir anasymen birge aýrýhanada jatyr. Ol suıyqtyq ishken soń birden aýyryp, ata-anasy jedel járdem shaqyrǵan. Sábı aýrýhanaǵa jetkizildi. Dárigerler onyń aýyz qýysy, óńeshi jáne asqazany qatty kúıip qalǵanyn aıtty.

«Meniń kúıeýim kólik jóndeýshi, bul suıyqtyq úıde turǵan edi. Balam ony abaısyzda iship aldy», - dedi balanyń anasy.

Dárigerler balaǵa aýyr toksıkalyq ýlaný dıagnozyn qoıǵan. Emdeýden keıin sábıdiń jaǵdaıy jaqsaryp, palataǵa aýystyryldy.

«Bala aýrýhanaǵa eki kún buryn tústi. Qazir bakterııaǵa qarsy preparattar, túrli jaqpamaılar qoldanylyp, em alyp jatyr», – deıdi Orynbaev atyndaǵy Gıperbarıkalyq oksınegatsııa ortalyǵynyń toksıkolog dárigeri Marat Kákenov.

Jýyrda bul aýrýhanaǵa sirke qyshqylyn iship qoıǵan 5 jasar bala aýyr halde túsken. Onyń aýzy jáne óńeshi kúıip ketken, biraq qazir bala óz betimen tamaqtanyp jatyr, jaǵdaıy qanaǵattanarlyq.

Medıtsına qyzmetkerleriniń aıtýynsha, eki jaǵdaıda da balalar eresekterdiń qaraýynsyz qalǵan. Sondyqtan dárigerler ata-analardan kúıdirgish suıyqtyqty balalardyń qoly jetpeıtin jerde saqtaýǵa keńes beredi.