Shymkentte 3 adamdy qaǵyp ketken polıtseı qamaýǵa alyndy
ShYMKENT. QazAqparat - Shymkentte 3 adamdy qaǵyp ketken polıtseıge qatysty qylmystyq is qozǵaldy. Kúdikti ýaqytsha tergeý abaqtysyna qamaýǵa alyndy, dep habarlaıdy QazAqparat HAA tilshisi.
Aıta keteıik, kisi ólimimen aıaqtalǵan jol kólik oqıǵasy Jibek joly kóshesiniń boıynda oryn alǵan bolatyn. «BMV» avtokóliginiń 32 jastaǵy júrgizýshisi 3 jaıaý júrginshini qaǵyp ketip, oqıǵa ornyna kóligin tastap ketip qalǵan. Ony kýágerler uıaly telefonǵa túsirip, beınejazbasyn áleýmettik jelige salǵan.
Jol apaty saldarynan oqıǵa ornynda 37 jastaǵy er azamat qaıtys bolyp, taǵy 36 jastaǵy áıel men onyń 7 jasar uly aýyr jaraqattanyp, aýrýhanaǵa tústi. Kýágerler jol boıynda qansyrap jatqanda jedel járdem qyzmetiniń keshigip jatqanyn da beıne túsirilimde kórsetti. Qazir osy oqıǵa boıynsha polıtsııa qyzmetkeriniń ústinen Qylmystyq kodekstiń 345-baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha is qozǵalyp, birqatar sot-medıtsınalyq saraptamalar taǵaıyndaldy. Sotqa deıingi tergeý amaldary júrgizilýde.
