Shymkentte 2765 otbasy ataýly áleýmettik kómek alýǵa ótinish berdi

ShYMKENT. QazAqparat – Shymkentte ataýly áleýmettik kómek alýǵa 2765 otbasydan ótinish qabyldanǵan. Bul týraly aqparat-kommýnıkasıa ortalyǵynda ótken baspasóz brıfınginde qala ákiminiń orynbasary Erbol Sadyr málimdedi, dep habarlaıdy QazAqparat tilshisi.

Erbol Sadyrdyń sózinshe, jańa formattaǵy ataýly áleýmettik kómekke qujat qabyldaý 5 qańtarda bastalǵan. Búgingi tańda 9 244 adamǵa keńes berilip, qujattar 5 mekenjaıda qabyldanyp jatyr.

«Bıyl barlyq tólemder elektrondy formatta ótedi. Ár aıdyń 5-10 aralyǵynda bir ýaqytta áleýmettik az qamtylǵan otbasylar járdemaqysyn alyp otyrady. Eger otbasy múshesi jumysqa ornalasýdan bas tartsa, AÁK tólenbeıdi. Eńbekke qabiletti bola tura jumys istemese, búkil otbasy múshelerine ataýly áleýmettik kómek tóleý toqtatylady»,- dedi qala ákiminiń orynbasary.

Erbol Sadyr sondaı-aq, úshinshi megapolıste az qamtylǵan otbasylarǵa beriletin memlekettik járdemaqy aıasynda 74 myńǵa jýyq bala ystyq tamaqpen qamtylatynyn atap ótti. Qujattar men járdemaqy taǵaıyndaý elektrondy túrde júrgiziledi. Ataýly áleýmettik kómek alýshylarǵa járdemaqy ár aıdyń 10-na deıin túsip otyrady.