Shymkentte 250 mln teńgeniń salyǵyn tólemegen kásipker sottaldy

ShYMKENT. QazAqparat - Shymkentte 250 mln teńge salyq bereshegin tóleýden jaltarǵan kásipker 7 jylyn túrmede ótkizedi, dep habarlaıdy QazAqparat tilshisi.

Shymkenttik kásipker salyq jáne bıýdjetke tólenetin basqa da mindetti tólemderdi tóleýden jaltaryp kelgen. Onyń memleket aldyndaǵy qaryzy 250 mln teńgege jetken. Qarjy monıtorıngi agenttiginiń Shymkent qalasy boıynsha departamenti JShS basshysyna qatysty qylmystyq isti aıaqtap, sotqa joldady.

Kúdiktige qatysty «qamaýǵa alý» túrindegi bultartpaý sharasy tańdaldy.

Sot úkimimen kásipker kináli dep tanylyp, oǵan 7 jyl 3 aı merzimge bas bostandyǵynan aıyrý jazasy taǵaıyndaldy. Sondaı-aq kommertsııalyq nysandarda 6 jyl boıy basshylyq qyzmet atqarýǵa tyıym salyndy.