Shymkentte 238 sábıge «Súıinshi» syılyq bokstary tabys etildi

ShYMKENT. QazAqparat - Shymkentte mereke kúnderi dúnıege kelgen 238 sábıdiń analaryna «Súıinshi» atty estelik bebı boks tabys etildi, dep habarlaıdy QazAqparat tilshisi.

«Súıinshi» syı qorabyna bóbekke qajetti zattardan basqa QR Prezıdenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy men balanyń týýy týraly kýáligi salynǵan.

28 jasynda kóp balaly ana atanǵan Aqbota Bekjanova da «Súıinshi» syılyǵyna ıe boldy. «Ulym dúnıege kelgen soń Prezıdentten alǵys alýyn jaqsylyqqa balap otyrmyz. Erekshe qurmet kórsetken Memleket basshysyna alǵys aıtyp, rızashylyǵymdy bildirgim keledi. Elimiz aman, Táýelsizdigimiz máńgilik bolsyn!» - dedi ol.

Táýelsizdik merekesiniń qarsańynda tórtinshi perzentin dúnıege ákelgen jas ana ulynyń esimin Aıdyn dep qoıǵan. Qazir sábıdiń jaǵdaıy jaqsy. Dárigerlerde jıi-jıi habarlasyp turady.

«Bizdiń qyzmetkerler 16 jáne 17 jeltoqsanda jumys istedi jáne AHAJ ókilderimen birlesip árbir sábı ómirinde óziniń alǵashqy qujatyn alýy úshin perzenthanalarda qujattardy qabyldady. Osy kezeńde Shymkent qalasynda barlyǵy 238 sábı dúnıege keldi, onyń ishinde 3 egiz bar», - dedi «Azamattarǵa arnalǵan úkimet» memlekettik korporatsııasy Shymkent qalasy boıynsha fılıal dırektory Danabek Isabekov.

«Súıinshi» syı qoraptaryn taratýdy QR Tsıfrlyq damý, ınnovatsııalar jáne aeroǵarysh mınıstrligi «Azamattarǵa arnalǵan úkimetpen» birge jáne QR Ulttyq banki, Tsentrkredıt banki jáne «Qazposhta» AQ qatysýymen uıymdastyrdy. Sondaı-aq, ata-analardyń qalaýy boıynsha perzenthanaǵa nemese úıine jetkizildi.