Shymkentte 210 metrlik murjanyń buzylýy jer silkinisin týdyrýy múmkin

ShYMKENT. QazAqparat - Shymkentte tozyǵy jetken úsh murjany buzýǵa tender jarııalandy. Olardyń eń úlkeniniń bıiktigi 210 metrdi quraıdy. Mundaı sheshimdi qala ákimdigi qabyldady, dep habarlaıdy QazAqparat tilshisi.

Belgili bolǵandaı, buzý jumystaryna qazynadan 9 mln teńge bólinip otyr.

Mamandar murjalardy bólshekteýdiń birneshe nusqasyn bekitken. Onyń bir sharty retinde buzý jumystaryn joǵarydan bastaý qarastyrylýda. Sebebi, bıiktigi 70 qabatty úımen para-par keletin nysan ózdiginen qulaıtyn bolsa, 2-3 baldyq jer silkinisin týdyrýy múmkin.  Onyń salmaǵy 500 tonna dep boljanýda.

«Murjany qulatý boıynsha qazir konkýrs jarııalandy. Onyń qorytyndysy  eki aptanyń ishinde shyǵady. Jeńimpaz belgili bolǵan sátten buzý jumystaryna kirisetin bolady», - dedi Shymkent qalalyq ákimdigi baspasóz qyzmetiniń jetekshisi.

Qazir qalalyq tótenshe jaǵdaılar qyzmeti alyp munaralarǵa jaqyn ornalasqan turǵyn úılerdi tekserip jatyr. Olar turǵyndardy buzý jumystarynan týyndaýy múmkin jer silkinisi týraly eskertýde.

Esterińizge sala keteıik, qorǵasyn zaýytyndaǵy eski munaralar men temirjol ústindegi kópir ábden tozyǵy jetip, qulaýǵa shaq qalǵan bolatyn. Bıiktigi 200 metrden astam, aýdany 30 metr bolatyn alyp murjalar ótken ǵasyrdyń 30-shy jyldary salynǵan. Qazir munda adamdar temir jınaý úshin keledi.

Ótken mamyr aıynda Shymkent qalasynyń ákimi ony buzý týraly sheshim shyǵardy.