Shymkentte 19 nysannyń qurylysy merziminde aıaqtalmaǵan
ShYMKENT. QazAqparat - Shymkent qalasy elimizdegi úshinshi megapolıske aınalýy úshin sáýletti qurylys pen ınfraqurylymdyq jaraqtandyrylýy, álemdegi órkenıetti qalalarǵa tán damýy tıis.
Bul týraly shahardaǵy qurylys nysandarynyń barysy talqylanǵan jıynda Ońtústik Qazaqstan oblysynyń ákimi Janseıit Túımebaev málim etti, dep habarlaıdy «QazAqparat HAA tilshisi.
Aımaq basshysynyń sózinshe, qalaǵa kireberis qaqpalar men jolaıryqtardy, aınalma jáne ishki oram joldardyń sapaly jasalýyna asa mán bergen jón. Sondaı-aq qurylystyń bastalýyn tym uzartyp jiberetin jobalaý-smetalyq qujattamalar zamanaýı úlgide ázirlenýi kerek.
Jalpy, bıylǵy jyly Shymkent qalasynda 20 áleýmettik nysannyń qurylysy júrip jatyr. Onyń ishinde 15 mektep, 2 sport, 2 mádenıet, 1 abattandyrý nysany bar. Atalǵan 20 nysannyń 11-i jyl sońyna deıin el ıgiligine tapsyrylatyn bolady. Al qalǵan 9 nysannyń qurylysy 2018 jylǵa ótpeli sanalady.
Budan bólek, qalada jalpy aýmaǵy 151 myń 228 sharshy metrdi quraıtyn 42 turǵyn úıdiń qurylysy júrgizilýde. Onyń 26-sy kommýnaldyq, 16-sy kredıttik turǵyn úı. Sonyń 30 turǵyn úıi jyl sońyna deıin paıdalanýǵa berilýi tıis. Qalǵan 16 úıdiń bitý kezeńi 2018 jylǵa qalyp otyr.
«Bıylǵy jyly Shymkent qalasynda 10 ınjenerlik ınfraqurylym nysanynyń qurylysy jalǵasýda. Búgingi kúnge 2 nysan paıdalanýǵa berilse, jyl sońyna deıin 1 nysannyń qurylysy aıaqtalady dep kútilýde. Al qalǵan 7 nysannyń qurylysy 2018 jyly paıdalanýǵa beriletin bolady» , - dedi Shymkent qalasy ákiminiń orynbasary Nuralhan Kósherov.
Munan bólek «Nurly jer» baǵdarlamasy aıasynda jalpy 107 nysanǵa jobalaý-smetalyq qujattamalaryn ázirleý jumystary júrgizilýde.
2017 jyly Shymkent qalasynyń ınfraqurlymyn damytý maqsatynda 14,5 mlrd teńge qarjy bólinip, 2016 jyly qurylysy bastalǵan 9 nysandy aıaqtaýǵa 1,6 mlrd teńge jumsalmaq. 83 kóshe ortasha jóndeý jáne 12 aıaqjol salý jumystaryna 970,8 mln baǵyttalǵan. Eń mańyzdysy, qaladaǵy 4 jolaıryqtardyń qurylysyna jobalyq smetalyq qujattar ázirlenýde. Desek te, Shymkent qalasyndaǵy 19 nysannyń qurylysy sozylyp, merziminde aıaqtalmaı, paıdalanýǵa tapsyrý merziminiń keshikkendigi anyqtalyp otyr. 19 nysannyń 13 nysany 2015-2016 jyldardan ótpeli bolsa, 6 nysany 2017 jyly bastalǵan. Buǵan sebep barshylyq. Kóbinde jobalaý-smetalyq qujattamalar daıyndaý úrdisi kesheýildep, memleket muqtajyna qaıtarylatyn jer telimderiniń merziminiń sozylýy qolbaılaý bolyp otyr.
«Qurylystyń kesheýildeýine kedergiler óte kóp. Sonyń biri - jobalaý-smetalyq qujattama ázirleý. Qujatty daıyndaýǵa 4 aı ýaqyt ketedi. Sondyqtan sheteldik tájirıbeni paıdalanyp, ázirleý jumystaryn zamanaýılandyrý qajet. Osy rette men túrkııalyq áriptesterdiń tájirıbesin paıdalanýdy jáne ózimizde qoldanysqa engizýdi tapsyramyn. Tipti qajet bolsa, semınar-trenıngter ótkizip, qurylysqa jaýapty merdigerlerdiń de jaýapkershiligin arttyrýǵa tıispiz», - dedi Janseıit Qanseıituly.
Jıyn barysynda sala basshylaryna qaladaǵy Qonaev dańǵylyn batys baǵytyna qaraı damytý ári aspaly kópirler men jolaıryqtardyń sapaly ári tıimdi bolýyn qadaǵalaý tapsyryldy.
