Shymkentte 186 mektepke 3,3 myń baqylaý kamerasy ornatyldy

ASTANA. QazAqparat - Májilis depýtaty, «AMANAT» partııasy fraktsııasynyń múshesi Bolatbek Najmetdınuly Shymkent qalasynyń turǵyndarymen kezdesýde, dep habarlaıdy QazAqparat.

Búgin polıtsııa departamentiniń ujymymen júzdesip, jedel basqarý ortalyǵynyń (JBO) jumysymen tanysty.

Polıtseılerdiń aıtýynsha, Shymkentte qylmys deńgeıin jáne tótenshe jaǵdaılar qaýpin azaıtý boıynsha arnaıy is-sharalar qolǵa alynǵan. Osy rette shaharda «Qaýipsiz qala» baǵdarlamasy sátti júzege asyrylyp keledi. Polıtsııa departamentiniń jedel basqarý ortalyǵynda 11 myńnan astam beınebaqylaý kamerasy biriktirilgen. Sonyń nátıjesinde jol qozǵalysy erejelerin buzý faktilerin avtomatty túrde tirkeýge, qıylystardaǵy jáne turǵyn úılerdiń aýlalaryndaǵy qoǵamdyq tártipti baqylaýǵa bolady.

Sonymen qatar, «Qaýipsiz mektep» baǵdarlamasy aıasynda 186 memlekettik jáne jekemenshik mektepterde 3,3 myńnan astam beınebaqylaý kamerasy ornatyldy. Onyń 2,5 myńǵa jýyǵy atalǵan ortalyqqa qosylǵan. Taǵy 260-qa jýyǵy jerasty ótkelderinde, densaýlyq saqtaý nysandarynda, saýda ortalyqtarynda, dúkender men bazarlarda qoıylǵan.

Beınebaqylaý kameralarynyń kómegimen osy jyldyń jeti aıynda Shymkentte 300-ge jýyq qylmys ashylyp, 33 myńnan astam ákimshilik quqyq buzýshylyq anyqtaldy.

Bolatbek Najmetdınuly halyqpen kezdesýleri kezinde mopedter men elektr skýterler tarapynan jol qozǵalysy erejelerin buzý máseleleri jıi kóteriletinin atap ótti. Depýtat zańnamalyq deńgeıdegi ózgeristerdi eskere otyryp, osy kólik túrlerine baqylaýdy kúsheıtý qajettigine nazar aýdardy. Sondaı-aq, bólingen qarajatty tıimdi paıdalaný jáne jumys sapasyn arttyrý máselesine erekshe toqtaldy.

Polıtsııa qyzmetkerlerimen áńgime barysynda kadr tapshylyǵyn sheshý, quqyq qorǵaý organdary qyzmetiniń bedelin arttyrýǵa qatysty suraqtar da talqylandy.

Májilis depýtattarynyń óńirlerge sapary odan ári jalǵasýda.