Shymkentte 1200 oryndyq jańa mektep paıdalanýǵa berildi
«Nurly jol» baǵdarlamasy aıasynda ashylyp otyrǵan bilim ordasynda oqýshylarǵa arnalǵan 61 oqý bólmesi men jańa úlgidegi bıologııa, fızıka, hımııa, ınformatıka, mýltımedııaly-lıngofondy kabınetter bar. Sondaı-aq jańa bilim oshaǵynda kitaphana, ashana, akt, sport zaldary men sport alańy, qyzdarǵa jáne uldarǵa arnalǵan sheberhanalar qarastyrylǵan.
«Halyq ıgiligi úshin jańa mektep ǵımaratynyń ashylýy mereıtoıymyzǵa arnalǵan úlken tartý dep sanaımyn. Búgin biz Táýelsiz elimizdiń erteńi, jarqyn bolashaǵymyzdyń senimdi tiregi bolatyn balalarymyzǵa úlken qýanysh syılap otyrmyz. Biz, Máńgilik eldiń qasterli qundylyqtaryn basshylyqqa ala otyryp, óskeleń urpaqtyń jahandaný dáýirine saı jan-jaqty jetilgen, tolyqqandy azamat bolyp ósýine, elimizdiń rýhanı jańǵyrýyna óz úlesimizdi qosýymyz qajet», -dedi №130 jalpy orta mektebiniń ashylý saltanatyna qatysqan OQO ákimi Janseıit Túımebaev.
Aıta keteıik, oblys boıynsha bilim berý salasynda osy jyly 82 nysannyń qurylysy júrgizilip, oǵan 29,8 mlrd teńge kóleminde qarjy qarastyryldy. Olardyń arasynda 32 nysandy paıdalanýǵa berý josparlanǵan. Al búgingi kúnge deıin óńirde 28 mektep ashylǵan bolsa, jyl sońyna deıin qalǵan bilim oshaqtary el ıgiligine beriledi dep josparlanyp otyr. Qalǵan 50 nysan keler jyldyń enshisinde. 
