Shymkentte 10 mektepke 19 avtobýs syıǵa tartyldy
ASTANA. QazAqparat - QR Táýelsizdiginiń 25 jyldyq merekesine oraı Shymkent qalasyndaǵy 10 mektepke oqýshy tasymaldaý úshin 19 jańa avtobýs berildi, dep habarlaıdy Ońtústik Qazaqstan oblysy ákimdiginiń baspasóz qyzmeti. Jańa kólikterdiń kiltin mektep dırektorlaryna oblys ákimi Janseıit Túımebaev tabystap, barsha jurtshylyqty mereıli merekemen quttyqtady.
«Qymbatty oqýshylar bul kólik sizderdiń qaýipsizdikterińizdi qamtamasyz etý jáne jaqsy oqyp, úlgili oqýshy bolýlaryńyz úshin berilip otyr. Sondaı-aq, avtobýs balalardy tarıhı-mádenı eskertkishterge saıahatqa shyǵýy úshin de qoldanylady. Bul ıgi shara Elbasynyń bolashaq urpaqqa jasaǵan qamqorlyǵy dep bilemin. Endi qaladaǵy 3 myńǵa jýyq oqýshy mektepke jeke avtobýstar arqyly tegin tasymaldanatyn bolady», - dedi aımaq basshysy.
Buǵan deıin oqýshylardy tasymaldaý jumystary kelisim-shart arqyly jeke kásipkerler «Abad ıÝG» JShS jáne «Tólebı Avtobýs Parki» JShS arqyly júrgizilip otyrǵan bolatyn. 
Bul avtobýstar mektepten 3 shaqyrym qashyqtyqta turatyn balalardyń tasymalyn uıymdastyrý úshin satyp alyndy.
Osy kúni kúrdeli jóndeýden ótken Shymkent qalalyq əkimshiliginiń eski ǵımaraty paıdalanýǵa berildi. Atqarylǵan jumystyń sapasyn óńir basshysy Janseıit Túımebaev pen qala ákimi Ǵabıdolla Ábdirahymov aralap kórdi.
Atap aıtar bolsaq, ǵımarattyń irgetasy 1950 jyly qalanǵan. 2015 jyldyń qyrkúıeginen bastalǵan nysannyń qaıta jóndeý jumystaryna 500 mln teńge bólindi.
Búgingi tańda bul ǵımaratqa Əl-Farabı aýdan apparatymen qatar qalalyq bilim bólimi, jolaýshylar kóligi jáne avtomobıl joldary bólimi ornalasty.
