Shymkentke jańadan qosylǵan 41 eldi mekenniń jaǵdaıymen tanysyp shyqtym - Erlan Aıtahanov

ShYMKENT. QazAqparat – Shymkent qalasynyń ákimi Erlan Aıtahanov jańadan qosylǵan eldi mekenderdiń qazirgi jaǵdaıyn jýrnalısterge aıtyp ótti. Shahar basshysynyń sózinshe, qala irgesindegi aýyldar ınjenerlik júıeler men jol jáne qoǵamdyq kólik máselesin sheshýdi qajet etedi, dep habarlaıdy QazAqparat tilshisi.

«Qalaǵa jańadan qosylǵan 41 eldi mekendi aralap, jaǵdaıymen tanysyp shyqtym. Ol jerdegi negizgi másele - ınjenerlik júıeler, jol jáne qoǵamdyq kólik máselesine qatysty. Aýyz sýmen qamtý boıynsha 10 eldi meken jartylaı (Abdýlabad, Turdyabad, Ótemis, Shaprashty, Bazarqaqpa, Jańatalap, Igilik, Kókbulaq, Táýelsizdik 20 jyl, Qyzyljar), 8 eldi meken tasyp ishedi (Batys, Soltústik saıajaı, Yntymaq-2, Aqjar, Aıkól, Asar-2, Aqtas-2, Turan). Qalanyń soltústik bóligin aýyz sýmen qamtamasyz etý úshin 3 magıstraldy sý qubyryn tartý qajet. Kelesi jyly Kómeshbulaq sý jınaqtaýshynan basty magıstraldy sý qubyry tartylyp, oǵan 2 magıstraldy sý qubyrlary qosylady»,- deıdi Erlan Aıtahanov.

Qala ákiminiń sózinshe, 2020 jyly 8 tasymalmen sý iship otyrǵan 72 myń, jartylaı qamtylǵan 9 eldi mekendegi 38 myńnan astam halyq aýyz sýmen qamtylady.

«Qalany káriz júıesimen qamtý kórsetkishi tómen (49%), sebebi magıstraldy júıelermen qatar, qoldanystaǵy tazalaý qondyrǵysynyń qýattylyǵy jetkiliksiz. Qalada kóp qabatty turǵyn úılerdi jáne shalǵaı eldi mekenderdi qamtý úshin 2 sý tazartý qondyrǵysyn salý qajet. Qazirgi tańda tehnıkalyq-ekonomıkalyq negizdemeleri ázirlenýde. Qurylysy 3 jyldyq josparǵa engizildi. Kelesi jyly, 1 magıstraldy jáne 5 eldi mekende káriz júıesiniń qurylysyn júrgiziletin bolady. Osynyń esebinen kórsetkish 49 paıyzdan 52 paıyzǵa jetedi»,- deıdi Erlan Aıtahanov.