Shymkentke Reseı, Ózbekstan, Belarýs, Ýkraına jáne Úndistannan dári-dármekter jetkizildi

ShYMKENT. QazAqparat – Shymkent qalasyna Reseı, Ózbekstan, Belarýs, Ýkraına jáne Úndistan elderinen juqpaly aýrýlardy emdeýge arnalǵan dári-dármekter jetkizildi. Sondaı-aq, 4 mlrd teńgege kelisimshart jasalǵan farmatsevtıkalyq óndirýshilerden tikeleı qala aýmaǵyna júk ushaǵy men úsh júk kóligi keldi, dep habarlaıdy QazAqparat tilshisi.

Qalalyq ákimdiktiń málimetinshe, dárilik preparattardy tasymaldaýǵa ruqsaty bar segiz kompanııa jetkizip bergen. Atap aıtqanda, levofloksatsın, tseftrıakson, deksemetazon, askorbın qyshqyly jáne basqa da preparattardyń 20-dan astam túri ákelindi. Atalmysh jumystar Memleket basshysy Qasym-Jomart Toqaevtyń tapsyrmasyna sáıkes, el halqyn dári-dármekpen qamtamasyz etý maqsatynda júrgizilip otyr. Dárihanalarǵa túsken vırýsqa qarsy preparattar JRVI, COVID-19, pnevmonııany emdeýge jáne dene qyzýyn tómendetýge arnalǵan.

«Ózbekstan Respýblıkasynan dári-dármekterdi bes kompanııa jetkizip otyr. Dári-dármekterdi jetkizý boıynsha kelisimsharttyń somasy tórt mıllıard teńgeden asady. Sonymen qatar, «Aq nıet« kompanııasy dári-dármektiń - 14 túrin, «Zerde« - 10, «Apteka-5«-8, «Qoıbaǵarov« JK - 9, «Otaý Med« - 23 túrin jetkizdi. Qazirgi tańda, kelip túsken dári-dármekter qalanyń iri dárihanalaryna tolyq jetkizildi» delingen habarlamada.