Shymkentke qosylǵan eldi mekenderge qoǵamdyq kólik qatynaı bastaıdy
ASTANA. QazAqparat - Shymkent qalasynyń ákimi Ǵabıdolla Ábdirahymov shahardyń ákimshilik aýmaǵyna qosylǵan eldi mekenderge qoǵamdyq kólik qatynaı bastaıtyndyǵyn jetkizdi, dep habarlaıdy QazAqparat tilshisi.
Búgin qala basshysy S.Erýbaev atyndaǵy 24-inshi mektepte ótken Eńbekshi aýdanynyń ákimi Ǵalymjan Ilıasovtiń jyldyq esebine qatysty.
Aýdan ákimi júzege asqan jobalar men oń ózgeristerge toqtalyp, keleshek josparlarymen bólisti. «Bilimdi urpaq - ult bolashaǵy» ekendigine toqtalǵan ol, esepti kezeńde 320 oryndyq 1 memlekettik jáne 446 oryndyq 4 jekemenshik balabaqsha ashylǵanyn, birqatar bóbekjaılar men mektepterde kúrdeli jóndeý jumystary júrgizilgenin aıtyp ótti.
Ǵalymjan Ilıasovtiń baıandamasynan soń suraq-jaýapqa kezek berilip, turǵyndar kókeılerindegi saýaldaryn qoıdy, usynys-tilekterin jetkizdi. Birqatar azamattar atqarylyp jatqan ıgi isterge, el úshin eńbek etip jatqan aýdan, qala basshylaryna alǵystaryn bildirdi.
Turǵyndardyń qaladaǵy qoǵamdyq kólik qyzmeti men onyń sapasyna qatysty aıtqan ótinishine qala ákimi Ǵabıdolla Ábdiraxymov bıylǵy jaz aıynda qosymsha 240 avtobýs satyp alynatynyn jetkizdi. Sondaı-aq aldaǵy ýaqytta qalaǵa qosylǵan 40 eldi mekenge 10 baǵytta qoǵamdyq kólik qatynaı bastaıdy, jańadan 100 avtobýs satyp alynady.
Álııa Bostan
