Shymkentke Atyraýdan ushyp kelgen 3 munaıshydan koronavırýs tabyldy

ShYMKENT. QazAqparat – Shymkentke «Atyraý-Shymkent» áýe reısimen «Teńizshevroıl» kompanııasynyń 383 qyzmetkeri ushyp keldi. Onyń 67-si - qala turǵyndary bolsa, ózgeleri - ózge óńirdiń jumysshylary, dep habarlaıdy QazAqparat tilshisi.

Qalalyq densaýlyq saqtaý basqarmasynyń málimetinshe, atalǵan áýe reısimen kelgen úsh azamattan koronavırýs tabylǵan. Naýqastar juqpaly aýrýlar aýrýhanasyna, al olarmen baılanysta bolǵan 64 jolaýshynyń barlyǵy karantındik stantsıonarǵa jatqyzylǵan.

«Vırýs anyqtalǵan azamatpen bir reıste ushyp kelgen jolaýshylardyń densaýlyǵy jáne qaýipsizdigi eskerilip, olar 14 kún stantsıonarda bolady. Al ushaqta bolǵan kórshiles óńirlerdiń turǵyndary óz mekenjaıy boıynsha medıtsınalyq baqylaýǵa alynǵan» delingen densaýlyq saqtaý basqarmasynyń málimetinde.