Shymkent zoobaǵynyń qustary syı retinde Astanaǵa jol tartty
ShYMKENT. QazAqparat - Shymkent zoobaǵynyń qustary Astana tsırkine syıǵa tartyldy.
Endi qyrǵaýyl tektes taýystar men erekshe taýyqtar qolda úıretilip, bas qalada óner kórsetetin bolady, dep habarlaıdy QazAqparat HAA tilshisi.
Qustardy shym shahar zoobaǵynan Astana tsırkiniń qustar úıretýshisi Aısulý Ábdikerimqyzy tańdap alypty. Bir apta buryn kelgen úıretýshiniń sózinshe, eki jup taýys pen úsh jup taýyqtar tsırkke tegin, tartý retinde beriledi.
«Shymkent jyly aımaq bolǵasyn munda qustardyń túrleri kóp. Sondyqtan qanattylardy osy jerden alýdy uıǵardyq. Biz negizinen aqkógershindermen óner kórsetemiz. Al bul qustar basqasha. Kógershinder kishirek bolǵandyqtan endi úlken qustarmen jumys istemek oıymyz bar. Men osy qustardy armandaǵanyma kóp boldy»,-dedi A.Ábdikerimqyzy.
Uzyn quıryqty qyrǵaýyl tektes ádemi qustar men taýyqtar búgin bas qalaǵa jol tartty.
Eske salaıyq, buǵan deıin Shymkent zoobaǵy Ońtústik tsırkine jańadan týylǵan qos abdandardy bergen bolatyn.
