Shymkent zoobaǵyndaǵy ańdar ólip jatyr
ShYMKENT. QazAqparat - Shymkent zoobaǵyndaǵy ańdar ólip jatyr. Aldymen asha tuıaqty bóken, keıinnen ońtústikamerıkalyq qoltyraýyn jan tásilim etken, dep habarlaıdy QazAqparat HAA tilshisi.
Ázirge zoobaq mamandary baýyrymen jorǵalaýshynyń jáne dala ańynyń ne sebepti ólgenin ashyp aıta almaı otyr. Barlyǵy arnaıy saraptamalardyń qortyndysy shyqqan soń belgili bolatynyn aıtady.
Belgilisi, qoltyraýyn zoobaqta 10 jyldaı ómir súrgen. Al, bóken jýyrda ǵana jańadan salynǵan Afrıka alańshasyna jiberilgen eken. Sol jerde soqtyǵysyp, kókirek tusymen jaraqattanyp qalypty. Onyń erte ólip qalýyna jaraqattary da sebep bolýy múmkin kórinedi.
Eske salaıyq, qazir zoobaqty keńeıtý sharalary júrgizilip, keıbir ańdar jańadan salynǵan alańshalarǵa kóshirilýde. Ondaǵy oryndardyń aýmaǵy keń ári ańdardyń júrip turýyna da qolaıly bolyp otyr.
