Shymkent zoobaǵynda joǵalǵan kesirtkeler úsip ólgen bolyp shyqty
ShYMKENT. QazAqparat - Shymkent zoobaǵynda iz-túzsiz joǵalyp ketti degen kesirtkeler sýyqtan úsip ólgen bolyp shyqty. Zoobaq qyzmetkerleri úsh baýyrymen jorǵalaýshynyń denesin 30 sm tereńdikten qazyp alǵan, dep habarlaıdy «QazAqparat HAA tilshisi.
Ótken jyly Qyzyl kitapqa engen kesirtkeler ashyq aspan astyna jasalǵan jańa orynǵa kóshirilgen bolatyn. Jabaıy tabıǵatqa uqsas jerde ózdiginen kóbeıip kete me dep úmittengen. Der kezinde as sýyn berip, kútim jasaǵanyn da aıtady. Alaıda kesirtkeler úshin bul jer kerisinshe qolaısyz bolyp shyqty. Buǵan deıin 6 kesirtkeniń biri tóbelesip qalyp, ólip qalǵan bolatyn. Ekinshisin qashyp bara jatqan jerinen áreń ustap alǵan. Taǵy úsheýi ininen shyqpaı qoıǵan edi. Olarǵa qatysty jergilikti veterınarlar qashyp ketken dep málimdeme jasaǵan bolatyn. Biraq ol aqparat rastalmady. Zoobaq qyzmetkerleri ólgen úsh kesirtke qumnyń arasynan taýyp aldy. Tek bir baýyrymen jorǵalaýshy ǵana qysty aman esen ótkizip otyr.
«Kesirtkeler qysta qalyń uıqyǵa ketken edi. Ol úshin or qazyp, qum tósep qoıǵanbyz. Sol jerge kirip, kóktemge deıin uıyqtaý kerek bolatyn. Syrtyna baqylaý kamerasy da qoıylǵan. Alaıda kóktemde de, jazda da biz olardy tappaı qaldyq. Tek qana osy shilde aıynda jatqan jerlerin qazyp kórip edik, máıitteri shyqty. Sýyqtan úsip ólgen bolýy múmkin dep boljap otyrmyz. Arnaıy saraptamalar qortyndysy naqty neden ólgenin anyqtaıtyn bolady», - deıdi zoobaq qyzmetkeri Raısa Dolgova.
Endi kesirtkeler ashyq aspan astyna shyǵarylmaıtyn boldy. Zoobaq qyzmetkerleri osyndaı sheshim qabyldaǵan. Olar bul orynǵa basqa ańdardy ornalastyramyz dep otyr.
