Shymkent zoobaǵynda 17 jyldan keıin tazqara qusy balapan shyǵardy
ShYMKENT. QazAqparat - Shymkent zoobaǵynda tazqara qustary kóbeıip keledi. Jýyrda ǵana qanattylardyń osy túri balapan shyǵardy. Mamandar onyń zoobaqta kóbeıýin óte sırek qubylys dep otyr, dep habarlaıdy QazAqparat HAA tilshisi.
Zoobaq qyzmetkerleriniń aıtýynsha, munda sońǵy ret tazqaralardyń balapan shyǵarýy 1999-2000 jyldar aralyǵynda bolǵan eken. Baqtaǵy tórt tazqaranyń ishinde bireýi juptasyp naýryz aıynda jumyrtqa salǵan. Sony baqylaýdyń nátıjesinde ratsıondy kúsheıtip, ıaǵnı beriletin qorektiń quramy qunarlandy. Kóp uzamaı tazqara bir balapan ashyp shyqty. Búginde kópten kútken balapanǵa «Qarabaı» dep at qoıylǵan. Qazirgi tańda mamandar onyń jaǵdaıy jaqsy, aldaǵy ýaqytta úlken tazqaralardyń qataryna qosylady dep otyr.
