Shymkent zaýytyndaǵy jarylys sebebine qatysty alǵashqy boljam aıtyldy
ShYMKENT. QazAqparat - Shymkent zaýytynda bolǵan oqys oqıǵaǵa qysqa tuıyqtalý ne sónbeı qalǵan temeki tuqyly sebep bolýy múmkin, dep habarlady «QazAqparat» HAA tilshisi.
«Maı 75 sharshy metr aýmaqqa tógilgen. Sebebi - qysqa tuıyqtalý nemese jumysshylar maı tógilgen kezde temeki shekken. Qazir saraptama taǵaıyndaldy. Nátıjesi shyqqan soń sebebi naqty belgili bolady», - dedi oblystyń TJD bas mamany Nurdáýlet Moldanııazov. Budan basqa, polıtsııada jarylys faktisi boıynsha QR QK 156-baby boıynsha sot aldy tergeý júrip jatyr.
Eske salsaq, oqıǵa keshe keshke oryn aldy. Motor maıyn KamAZ tsısternasyna quıý ýaqytynda maı órtengen. Artynsha konteıner jaryldy. Saldarynan bir adam oqıǵa ornynda kóz jumsa, ekeýi aýrýhanaǵa jetkizildi. 31 jastaǵy er adamnyń denesin 95 paıyz kúıik shaldy.
Dárigerlerdiń aıtýynsha, onyń jaǵdaıy asa aýyr. 49 jastaǵy KamAZ júrgizýshisiniń denesi 35 paıyz kúıgen. Ol aýyr jaǵdaıda jatyr. Alaıda dárigerler ony aman alyp qalý múmkin ekenin aıtýda.
