Shymkent zaýytynda jarylys saldarynan jumysshy qaza boldy
ShYMKENT. QazAqparat - Shymkent qalasynda zaýytta bolǵan jarylys saldarynan jumysshylar zardap shekti, dep habarlaıdy «QazAqparat» HAA tilshisi.
«OQO TJD-nyń baspasóz qyzmetinen málim etkendeı, 20 jeltoqsan kúni saǵat 20:00 shamasynda motor maılaryn óndiretin «Hıll korporeıshn» JShS-nyń zaýytynda jarylys boldy. Saldarynan quıý stansysynyń 1991 jyly týǵan operatory oqıǵa ornynda mert boldy. 1985 jyly týǵan taǵy bir operatordyń 80 paıyz denesin kúıik shaldy, ol Gıperbarııalyq oksıgenatsııa ortalyǵyna jetkizildi. Osy ortalyqqa sondaı-aq 1967 jyly týǵan KamAZ júrgizýshisi jetkizildi. Jarylystan keıin birden órt bastaldy. Arnaıy kólikter oqıǵa ornyna 20:30-da jetip, jalyndy 10 mınýttyń ishinde aýyzdyqtady. Órt pen jarylystyń sebebi anyqtalýda.
