Shymkent turǵynynan tapansha men oq-dáriler tárkilendi
Shymkent qalasy polıtsııa departamenti Uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalary kezinde atys qarýy men oq-dárilerdi zańsyz saqtaǵan 31 jastaǵy azamatty anyqtady. Jedel ýákilder kúdiktiniń jeke basyn tintý barysynda odan 9 mm Makarov tapanshasy men 3 dana oq-dári tárkiledi.
«Sot-ballıstıkalyq saraptama qorytyndysyna sáıkes, tárkilengen qarý 9 mm atýǵa jaramdy jaýyngerlik tapansha ekeni naqtylandy. Atalǵan jaıt QR QK-niń 287-baby «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» boıynsha tirkeldi. Búgingi kúni qarýdy zańsyz saqtaý deregi boıynsha sotqa deıingi tergeý áreketteri júrgizilip jatyr», - delingen Shymkent qalasy polıtsııa departamentiniń baspasóz qyzmeti taratqan habarlamada.
Foto: Shymkent qalasy PD baspasóz qyzmeti