Shymkent turǵynyn oıynshyq tapanshamen qorqytyp, aqshasyn tartyp alǵandar ustaldy
Saryaǵash aýdandyq polıtsııa bólimine Shymkent qalasynyń turǵyny aryzdandy. Er adam túski ýaqytta óziniń «Gazel» kóligine otyrǵan sátte oǵan shabýyl jasalǵan. Medıtsınalyq betperde kıgen eki adam ony qarýmen qorqytyp, ishinde 700 000 teńgege jýyq aqshasy bar sómkesin tartyp alyp, izin sýytqan.
Atalǵan jaıtty polıtsııa qyzmetkerleri Qylmystyq kodekstiń 190-baby boıynsha tirkedi.
Jasalǵan qylmystyń aýyrlyǵy men ashyqtan-ashyq qoryqpaı jasalǵanyn eskere otyryp, polıtsııada osy aýyr qylmysty ashýǵa baǵyttalǵan jedel-tergeý toby quryldy. Aýdandyq polıtseılerge kómek kórsetý úshin oblystyq polıtsııa departamentinen bir top jedel-izdestirý toby keldi.
Polıtsııa qyzmetkerleri bir apta ishinde kýágerlerden jaýap alyp, beınebaqylaý kamerasynyń jazbalaryn muqııat qarap, tekserip shyqty. Nátıjesinde jedel top músheleri kúdiktiler mingen avtokólik pen onyń memlekettik nómirin anyqtady.
Alaıda, memlekettik nómir jalǵan bolyp shyqty. Polıtseıler qylmyskerlerdi izdestirýdi ary qaraı jalǵastyrdy.
Osylaısha tártip saqshylary kúdiktilerdiń birin Shymkent qalasynyń jaldamaly páterinen ustady. Ol megapolıstiń úsh ret sottalǵan turǵyny bolyp shyqty. Urlanǵan aqshany óz qajetine jumsaǵan. Kúdikti qamaýda.
Qazirgi ýaqytta jedel-tergeý toby qaraqshylyq shabýylǵa qatysýshynyń ekinshisin ustaý boıynsha sharalar qabyldaýda. Sondaı-aq, kúdiktiniń jábirlenýshini oıynshyq tapanshamen qorqytqany anyqtaldy. Qazirgi ýaqytta sotqa deıingi tergeý júrip jatyr.