Shymkent turǵyny TJD basshylyǵyna alǵysyn jetkizdi
Tótenshe jaǵdaı «Nursát» móltek aýdanyndaǵy kópqabatty úılerdiń birinde túngi 00:18 mınýttar shamasynda bolǵan edi. Jedel kezekshilerdiń basqarý pýltine páterlerdiń birinde tútin shyǵyp jatqanyn aıtyp, kópqabatty úıdiń turǵyndary habarlasqan. Oqıǵa ornyna órt sóndirý qyzmetiniń 8 adamnan turatyn jeke quramy men 2 tehnıkasy jiberildi. Tótenshe jaǵdaılar qyzmetkerleri páterdiń ishinde adam bar ekenin anyqtap, temir esikti buzyp kirgen. Sóıtip ondaǵy boıjetkendi syrtqa shyǵaryp, alǵashqy medıtsınalyq kómek kórsetken. Keıinnen úı ıesiniń elektr peshine tamaqty qoıyp, umytyp ketkeni anyqtalǵan. Nátıjesinde bólme qatty tútinge oranyp, saldarynan ondaǵy turǵyn esinen tanyp qalǵan. Sol sebepti aman qalǵan úı ıesi órt sóndirýshiler men TJD bastyǵy Nurbolat Derbisovke sheksiz alǵysyn hatpen jetkizdi. Sondaı-aq, departament basshylyǵynan erekshe kózge túsken órt sóndirýshilerdi marapattaýdy ótingen.
«Sizge Shymkent qalasynyń № 1 órt sóndirý bóliminiń qyzmetkerleriniń jedel jáne úılesimdi is-áreketteri úshin alǵysymdy bildiremin. Meni órt sóndirýshi-qutqarýshylar der kezinde jetip, qutqardy. Olardyń kásibıli sheberligi bolmaǵanda qazir maǵan ne bolaryn da elestete almaımyn. Sizderdiń órt sóndirýshilerińiz tek órtti sóndirip ǵana qoımaı, alǵashqy kómekte te kórsete alatyndyǵyna kózim jetti. Shyn júrekten sizderdiń qyzmetkerlerińizge taýsylmas qaırat, kásibı sáttilik, zor densaýlyq, baqyt jáne amandyq tileımin», dep jazylǵan Saparkúl Tynybekova hatynda.