Shymkent turǵyny kámeletke tolmaǵan qyzdy 1 mln teńgege satqan
TÚRKІSTAN. QazAqparat - Túrkistan oblysynda kámeletke tolmaǵan qyzdy klıentke satyp jatqan jerinen Shymkent turǵyny ustaldy, dep habarlaıdy QazAqparat polisia.kz saıtyna silteme jasap.
Áıel adam qyz balany 1 mıllıon teńgege baǵalaǵan. Anyqtalǵandaı, jeńgetaı ony ıntımdik qyzmet úshin buǵan deıin birneshe ret jalǵa bergen.
«13 sáýir kúni Túrkistan oblystyq Polıtsııa departamentiniń krımınaldyq polıtsııa basqarmasyna áıel adam kámeletke tolmaǵan qyzdy jynystyq qyzmet kórsetý úshin belgili somaǵa satatyny týraly habarlama tústi. Atalǵan jaıt QR Qylmystyq kodeksiniń 309-babynyń 2-bóligi (jezókshelikpen aınalysýǵa arnalǵan prıtondar uıymdastyrý nemese ustaý jáne jeńgetaılyq) boıynsha sotqa deıingi tergep-tekserýdiń biryńǵaı tizilimine tirkeldi. Sol kúni jedel-izdestirý is-sharasy barysynda, Túrkistan oblysy PD KPB jáne Saıram aýdandyq polıtsııa bóliminiń qyzmetkerleri Saıram aýdany Aqsýkent aýylyndaǵy qonaqúılerdiń birinen kámeletke tolmaǵan qyzdy satý kezinde Shymkent qalasynyń turǵynyn ustady», - delingen málimette.
Kámelet jasyna tolmaǵan qyz bala da Shymkent qalasynyń turǵyny, oqý oryndarynyń biriniń stýdenti.
«Polıtsııa qyzmetkerleri kúdikti áıelden aıǵaqzat retinde mıllıon teńge aqshany tárkilep aldy. Tergeý barysynda kúdikti osy qyzdy jynystyq qyzmet kórsetý úshin buǵan deıin birneshe ret usynǵany anyqtady. Jeńgetaı kelissózderdi telefon arqyly júrgizip, klıentterge messendjermen kámeletke tolmaǵan qyzdyń sýretin kórsetip otyrǵan. Ony pák, taza dep syltaýratyp, klıentterden iri kólemde aqsha surap, kelisýden keıin kezdesýdi uıymdastyryp otyrǵany belgili boldy», - dedi polıtsııadan.
Atalǵan fakti boıynsha sotqa deıingi tergeý amaldary júrgizilip jatyr. Kúdikti qamaýǵa alyndy. Túrkistan oblysynyń polıtseıleri istiń tolyq mán-jaıyn jáne áıeldiń basqa da osyǵan uqsas qylmystarǵa qatysy bar-joǵyn anyqtaýda.
