Shymkent turǵyny dámhanaǵa qolyna tapansha ustap, kirip kelgen
ShYMKENT. QazAqparat - Dámhanaǵa qarýmen kelgen Shymkent qalasynyń turǵyny ustaldy. Polıtseıler 36 jastaǵy azamattan gazdy-travmatıkalyq tapansha tárkilep otyr
Oblystyq ishki ister departamentiniń baspasóz qyzmeti habarlaýynsha, oqıǵa 29 naýryzdan 30-na qaraǵan túni bolǵan. Eńbekshi polıtsııa bólimine kúzet agenttiginen sýyt habar túsedi. Jeke kúzetshiler qaladaǵy dámhanalardyń birine kelgen jigittiń qolynan qarýǵa uqsas zatty baıqapty.
Oqıǵa ornyna shuǵyl túrde jetken jergilikti polıtsııa qyzmetiniń jol-patrýldik polkiniń qyzmetkerleri Shymkent qalasynyń 1980 jylǵy azamatyn ustady. Tintý kezinde jigittiń belinen «Action-SM» markaly gazdy-travmatıkaly tapansha tárkilendi.
Máseleni jan-jaqty tekserý úshin tártip saqshylary kúdiktini Eńbekshi polıtsııa bólimine jetkizdi. Osy fakti boıynsha qylmysty kodekstiń 287-baby (qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý,ótkizý, saqtaý, tasymaldaý nemese alyp júrý) boıynsha is qozǵaldy. Sotqa deıingi tergeý jumystary júrgizilýde dep habarlaıdy otyrar.kz.
