Shymkent turǵyny tsıtrýsty jemister men banan ósiredi
Baǵban Aslan Bekturǵanov týysymen birge bul isti alǵashynda hobbı retinde bastaǵan eken. Jylyjaı salyp, lımonnyń «Meıer» degen sortyn egip kóredi. Qandaı is bastasa da nátıjesin kórmeıinshe jany tynysh tappaıtyn baǵban alǵashqy ónimdi bes jyl kútipti, búginde turaqty klıentteri de bar. Lımon erekshe kútimdi qajet etedi degen ol óz isiniń syrymen de bólise ketti.
«Lımonǵa qatty ylǵal aýa kerek. Mınýs temperatýraǵa shydamaıdy, 1 gradýs jylylyqtan 50 gradýs ystyqqa deıin tura beredi. Buny tóbeden jańbyrlatý tásili arqyly sýaramyz, astynan tamshylatý ádisin qoldanamyz. Bıyl osy taldan 220 dana lımon aldyq», - dedi Aslan Bekturǵanov.
Baǵban bul kásipke qyzyqqandar úshin lımon kóshetin satyp, tipti ony kútýde óz keńesimen de bólisip keledi. Kóshet baǵasy kólemine qaraı 2500 teńgeden bastalyp, daıyn aǵashtary 50-70 myń teńgege deıin barady. Jas baǵban endi osy kásipti keńeıtip, ónimmen tek Shymkentti emes, kúlli eldi qamtamasyz etsek degen jospar quryp otyr. Tek memleketten jemistiń bul túrine eshbir qoldaý berilmeıdi eken.
"Memleketten qoldaý bolsa qanekı, árıne... Osylaı ózimizdiń otandyq ónim etip, tek Shymkentti ǵana emes, kúlli Qazaqstandy qamtamasyz etetindeı etip úlken jylyjaı salýǵa áreket jasap jatyrmyz»,-dedi ol.
Shymkent turǵynynyń baǵynan tek lımon emes, tsıtrýsty jemisterdiń ózge de túrlerin kezdestirýge bolady. Máselen, apelsın men mandarın, greıpfrýt, tipti banan da bar. Biraq bul jemisterden áli ónim ala qoımapty.
Atalǵan baqtan sırek kezdesetin dekoratıvti gúlderdi de kóresiz. Bul iske anasy qolǵabys etedi eken. Budan ózge turǵyn balyqtyń «Karp Koı» atty japonııalyq túrin asyraıdy.
«Alystan kóz janaryn alatyn túrli-tústi balyqty da kóbeıtý josparda bar», - deıdi Aslan Bekturǵanov.