Shymkent turǵyndary jaryqsyz qaldy

ShYMKENT. QazAqparat - Aýa raıynyń qolaısyzdyǵyna baılanysty Shymkenttiń júzdegen turǵyny jaryqsyz qaldy. Elektr qýaty 23 baǵyt boıynsha ajyratyldy, dep habarlaıdy QazAqparat tilshisi.

Qazirgi ýaqytta qala boıynsha 16 avarııalyq brıgada, 11 arnaıy tehnıka jumys isteýde.

- «Ońtústik Jaryq» mekemesiniń apattyq brıgadalary aqaýlardy joıý jumystaryn júrgizýde. Olardyń barlyǵy kúsheıtilgen rejımge kóshirilip, úzdiksiz jumys júrgizýde. Aqaýlar joıylysymen abonentterge elektr energııasy beriletin bolady – deıdi Shymkent qalasy TJD qoǵammen baılanys tobynyń bas mamany Zarıpa Turysbekova.

Al, joldardyń jaǵdaıyna jaýap beretin kommýnaldyq qyzmetter de kúsheıtilgen jumys rejımine kóshirilgen. Qar tazalaý jumystaryna barlyǵy 95-ke jýyq tehnıka men 500-ge jýyq jumysshy jumyldyryldy.

Al, «Ońtústik joldary» MKK kezekshi operatorynyń habarlaýynsha, búgin tańerteńnen beri «Qorǵas-Almaty-Taraz-Shymkent-Tashkent» respýblıkalyq mańyzy bar avtojoldarynda qozǵalys jabyldy. Meteorologııalyq jaǵdaılardyń nasharlaýyna baılanysty (nóldik kórý, boran, burqasyn, kóktaıǵaq) barlyq avtokólik túrleri úshin 593 km-den 654 km-ge deıin, Jambyl oblysynyń shekarasynan Túrkistan oblysynyń Mashat aýylyna deıin avtokólikterdiń qozǵalysy toqtatyldy.