Shymkent turǵyndary WhatsApp-pen taraǵan jalǵan habarlamaǵa aldandy

Áleýmettik jelidegi jalǵan aqparat birqatar aýdannyń da turǵyndaryn álekke saldy. Kitaphana aldyna Arys qalasy men Ordabasy aýdanynan da ata-analar kelgen. Olardyń barlyǵy da jańa oqý jyly qarsańynda uıaly telefondaryna «WhatsApp» jelisi arqyly habarlama túskenin aıtady. Onda «2010 jáne 2011 jyly týǵan balalarǵa mektepke qajetti quraldar tegin taratylady» delingen. Ata-analar aqparattyń jalǵandyǵyn kitaphana aldyna kelgende bir-aq bildi.
«Biz bul jerge balalarymyzben birge kelgen edik. Alaıda habarlamanyń ótirik ekenin bilip otyrmyz. Sol habarlama jibergender tym bolmasa kitap, syzǵysh berse de ókpelemes edik. Balalardy oqý bastalmaı jatyp ótirikke baýlyp otyrmyz. Bul jerde jaǵdaıy ortasha jáne nasharlary da bar», - deıdi Shymkent qalasynyń turǵyny Orynkúl Ábdiraıymova.
Ata-analar habarlamanyń jalǵan ekendigine ábden kóz jetkizgennen keıin úılerine tarqasty.
Qazir Ońtústik oblystyq Іshki ister departamentiniń ókilderi bul aqparattyń shyǵý tórkinin anyqtaýda.