Shymkent turǵyndary ákimge qoqys polıgony máselesin jetkizdi

ShYMKENT. QazAqparat - Shymkenttik turǵyndar ákimge qoqys polıgonynyń máselesin jetkizdi. Ondaǵy jaǵymsyz ıis pen tútinnen keletin zııannan qaýiptenetinin aıtty, dep habarlaıdy QazAqparat tilshisi.

Búgin qala ákimi Murat Áıtenov Abaı aýdanyna qarasty Aqjar turǵyn alabynyń turǵyndarymen kezdesip, olardyń máselesin tyńdady.

Sonymen birge eldi mekendi ınfraqurylymmen qamtý jumystarymen tanysty.

Jergilikti turǵyndar Shymkent-Tashkent A-2 kúre jolynyń boıynda ornalasqan qoqys polıgonynyń máselesin kóterip, ondaǵy jaǵymsyz ıis pen tútinnen turǵyndarǵa keletin zııandardan qaýiptenetinderin aıtty.

Turǵyndardyń ótinishine jaýap bergen qala basshysy polıgonǵa túsetin turmystyq qatty qaldyqtar kólemi kún saıyn 550-600 tonna, jylyna 200000 tonna ekenin aıtyp, qoqys polıgonynyń júktemesin azaıtý maqsatynda qala aýmaǵynan taǵy bir qoqys polıgonyn salý máselesi boıynsha ınvestor qarastyrylyp jatqanyn jetkizdi.

2014 jyly qurylǵan polıgonnyń aýmaǵy 34 gektardy quraıdy. Onyń aýmaǵynda aýdany 5 gektar bolatyn qoqys óńdeý zaýyty ornalasqan.

Al, zaýytta suryptalǵan qaldyqtar shuńqyrǵa kómiledi.

Sonymen birge halyq ortalyq jáne ishki oramdyq kóshelerge asfalt, sýaǵar jáne jaıaý júrginshiler jolyn salý máselesinde kóterdi.

Osy rette ákim ótken jyly turǵyn alabtaǵy 8 kóshege shaǵal tas tóselip, eki kóshe jaryqtandyrylǵanyn, bıylǵy jyly 29 kóshege asfalt jol salynatynyn málim etti.

Ákim turǵyndardyń basqa da saýaldaryna jaýap berip, onyń sheshilý joldary boıynsha tıisti sala basshylaryna tapsyrma berdi.

Bes myńnan astam halqy bar Aqjar turǵyn alaby sapaly elektr, tabıǵı gaz, aýyz sýmen tolyq qamtamasyz etilgen.

Al, 2021 jyly bıýdjet esebinen 3 sport alańsha ornatylyp, paıdalanýǵa berilse, bıyl 1 sport jáne 1 balalar alańshasyn ornatý úshin qarjy qaralǵan.