Shymkent túbindegi ushaq apatynda qaza bolǵandardyń ishinen 9 adamnyń kim ekendikteri tanyldy - QB Bas prokýratýrasy
ASTANA. 28 jeltoqsan. QazAqparat - Shymkent túbinde ushaqtyń qulaýynyń mán-jaılaryn tergeýge qatysý úshin Ýkraınadan mamandar keldi. Bul týraly búgin Astanada ótken brıfıngte Bas prokýratýranyń resmı ókili Nurdáýlet Súıindikov málim etti.
«Osy qaıǵyly oqıǵany tergeý úshin prokýratýra, ulttyq qaýipsizdik jáne ishki ister organdarynyń eń tájirıbeli tergeýshileri men qyzmetkerlerinen vedomstvoaralyq jedel tergeý toby qurylyp, bas áskerı prokýratýranyń arnaıy prokýrorynyń basshylyǵymen jumys jasaýda. Apattyń mán-jaılaryn zertteýge Qorǵanys mınıstrliginiń, Іshki ister, Ádilet jáne Densaýlyq saqtaý, sondaı-aq avıatsııa organdarynyń eń bilikti sarapshylary men krımınalısteri tartyldy. Sonymen qatar, ushaqtyń qulaýynyń mán-jaılaryn tergeýge qatysý úshin Ýkraınadan «ÝkrSpetsEksporttyń» jáne Ýkraına avıatsııalyq-jóndeý zaýytynyń 7 mamany keldi», - dedi resmı ókil.
Onyń sózine qaraǵanda, qazirgi ýaqytta oqıǵa bolǵan jerdi qaraý tolyqtaı aıaqtaldy. Sot-medıtsınalyq sarapshylarymen tabylǵan máıit bólshekteriniń 27 adamǵa tıesili ekendigi rastaldy.
N. Súıindikovtiń sózine qaraǵanda, búginde ushaq apatynan ajal qushqandardyń týystarymen 9 adam tanyldy. Olar podpolkovnıkter A. Aıymbetov, S. Dosybekov, A. Shýkanov jáne Vıacheslav Rahmanov, maıor shenindegi A. Ibraev pen O. Golýbev. Sondaı-aq, aǵa serjant M. Qonaqbaı, serjant G. Dolambaeva, kishi serjant P. Vıazıkov bar.
«Máıitterdi taný jalǵasýda, denelerdiń eleýli zaqymdary bar máıitter boıynsha genomdyq saraptama taǵaıyndalyp, júrgizilýde. Tergeýmen qaza bolǵandardy tezarada ıdentıfıkatsııalaý jáne jerleý úshin otbasylaryna berý boıynsha barlyq qajetti sharalar qoldanylatyn bolady», - dep túıdi resmı ókil.
Esterińizge sala keteıik, 25 jeltoqsanda Shymkent mańynda shekara qyzmetiniń AN-72 áskerı-kóliktik ushaǵy apatqa ushyrap, ekıpajdyń barlyq músheleri jáne onyń jolaýshylary mert boldy.
